Qyzmet babyn asyra paıdalandy dep aıyptalǵan Mańǵystaý oblysy Densaýlyq saqtaý basqarmasynyń burynǵy bastyǵy Jamal Jamanbaevaǵa qatysty qylmystyq is boıynsha Aqtaý qalalyq sotynyń úkimi jarııalandy, dep habarlaıdy Egemen.kz zakon.kz saıtyna silteme jasap.
Sotta anyqtalǵandaı, Jamal Jamanbaeva Mańǵystaý oblysynyń densaýlyq saqtaý basqarmasynyń basshysy bola otyryp, belgilengen qyzmettik mindetter men shekteýlerge qaıshy áreketke baryp, 2020 jyldyń tamyzynda «Sentropharm» JShS-men bir jerden COVID-19 ınfeksııasynyń el aýmaǵynda taralýyna baılanysty 222 000 000 teńge somasyndaǵy 6 jyljymaly rentgen apparatyn satyp alý týraly kelisim jasasqan.
Jabdyqtardy satyp alý úshin 2020 jyldyń bıýdjettik josparyna bıýdjettik ótinim joldap, onda naryqtyq qunnan da joǵary baǵa kórsetilgen. Qysqasy, oblystyq máslıhattan medısınalyq tehnıkany satyp alýǵa qarajat bólý suralǵan, nátıjesinde qalalyq máslıhattyń sheshimi boıynsha ol qarajat bólingen.
«Alaıda, memlekettik mekemelerdi materıaldyq-tehnıkalyq qamtamasyz etý talaptaryna sáıkes, bul arada oblystyq qazynashylyq departamentiniń kelisimi tirkeýden ótpeı qalady. Osydan keıin J.Jamanbaeva vedomstvosyna baǵynyshty medısınalyq mekemeler arqyly satyp alý maqsatynda aýdandyq emhanalardyń dırektorlarymen jyljymaly rentgen apparattaryn satyp alý úshin «Sentropharm» JShS-men kelisim jasasýdy talap etken», dep habarlady sot.
Jamal Jamanbaeva qymbat baǵada jabdyqtardy satyp alý arqyly memleketke 29 540 000 teńge zalal keltirgen.
«Sotqa deıingi tergeý barysynda ol kinásin moıyndady, keltirilgen zııannyń orny toltyryldy, soǵan baılanysty kinásin moıyndaý týraly prosessýaldyq kelisim jasaldy. Sot talqylaýynda sottalýshy óz kinásin moıyndady, qylmystyq is materıaldary negizinde jınalǵan dáleldemelerdiń mańyzdylyǵy men ruqsat etilýine qatysty daý týdyrmady», dep atap ótti sot.
Jaza taǵaıyndaý kezinde sot sottalýshynyń kámeletke tolmaǵan balalary baryn, onyń jaqsy jaqtaryn, buryn qylmystyq jaýapkershilikke tartylmaýy jáne jazasyn jeńildetetin basqa da mán-jaılar eskerildi. Sot jazany aýyrlatatyn mán-jaılardy anyqtaǵan joq.
Sot úkimimen Jamal Jamanbaeva QR Qylmystyq kodeksiniń 361-baby 4-bóliginiń 3-tarmaǵy boıynsha 3 jyl 6 aıǵa bas bostandyǵyn shekteý jazasyn arqalap, kináli dep tanyldy. Memlekettik qyzmette, sýdıada, jergilikti atqarýshy organdarda, Ulttyq bankte jáne onyń qurylymdyq bólimshelerinde, qarjy naryǵyn jáne qarjy uıymdaryn, memlekettik uıymdar men kvazımemlekettik sektor sýbektilerin retteý, baqylaý jáne qadaǵalaý jónindegi ýákiletti organda laýazymdy qyzmet atqarý quqyǵynan ómir boıyna aıyryldy.
Sot úkimi zańdy kúshine áli engen joq.
Aıta keteıik, ol Mańǵystaý oblysynyń densaýlyq saqtaý basqarmasynyń bastyǵy bolyp 2020 jyldyń mamyr aıynda taǵaıyndaldy. Buǵan deıin ol kóptegen jyldar boıy Mańǵystaý oblystyq perınataldyq ortalyǵyn basqarǵan. Onyń qamaýǵa alynǵany týraly aqparat 2021 jyly 4 aqpanda belgili boldy.