Elbasy Nursultan Nazarbaev О́zbekstan Respýblıkasynyń Prezıdenti Shavkat Mırzıeevpen telefon arqyly sóılesti. Olar bir-birin kele jatqan Jeńistiń 76 jyldyq mereıtoıy jáne Oraza Aıt merekesimen quttyqtady, dep habarlaıdy Egemen.kz QR Tuńǵysh Prezıdentiniń resmı saıtyna silteme jasap.
Taraptar eki eldiń baýyrlas halyqtarynyń ıgiligi úshin dástúrli tatý kórshilik, ózara senim jáne san ǵasyrlyq dostyq rýhynda damyp kele jatqan Qazaqstan men О́zbekstanyń strategııalyq qatynasynyń qazirgi deńgeıin joǵary baǵalady.
Buǵan saıası saladaǵy jemisti qarym-qatynas, bıyl saýda kóleminiń ulǵaıǵany jáne shekaralyq saýda salasyndaǵy isker toptardyń ózara is-áreketine jańa múmkindikter jasalǵany, birlesken ekonomıkalyq jáne óńiraralyq jobalar júıeli túrde júzege asyrylyp jatqany, mádenı-gýmanıtarlyq baǵdarlamalardyń nasıhattalýy áser etip otyr.
Sońynda taraptar óńirde beıbitshilikti, turaqtylyq pen qaýipsizdikti nyǵaıtý úshin kópjaqty yntymaqtastyqty arttyrý jáne tereńdetý qajettigi týraly pikir bildirdi.