Elimizde 1200-ge jýyq aýyldar áli kúnge deıin aýyz sýmen qamtylmaǵan. Bul týraly májilis depýtaty Erlan Saırov aıtty, dep habarlaıdy Egemen.kz.
«Táýelsizdik alǵaly 30 jyl ishinde elimizdegi aýyzsý máselesine 1 trln teńge qarajat jumsalǵan. Qazaqstanda 1200-ge jýyq aýyl-aımaq áli kúnge deıin aýyz sýdyń zardabyn tartyp otyr. Memleket basshysy 2025 jylǵa deıin elimizde aýyzsý máselesi 100% oń sheshim tabý kerektigin aıtty. Alaıda, bul máselede sheshilmegen problemalar kóp», deıdi Nur Otan partııasy janyndaǵy Sybaılas jemqorlyqqa qarsy is-qımyl jónindegi qoǵamdyq keńestiń tóraǵasy Erlan Saırov.
Onyń aıtýynsha, aýyzsý máselesin sheshý joldary ákimdiktegiler men mınıstrliktegiler arqyly qarjylandyrylady.
«Dál osy baǵytta máseleler kóp. Máselen, Shyǵys Qazaqstan, Almaty oblystarynda aýyldan eki shaqyrymdyq jerlerde sý shyǵaratyn úlken nasostar ornatylǵan. Árbir nasosqa 30-40 mln teńge ketedi. Biraq aýyldarǵa magıstral tartylmaǵan. Endi magıstral tartylǵansha nasostar isten shyǵady. Sonda halyqtyń aqshasynyń bári jelge ushyp jatyr. Aýyzsý máselesin sheshý úshin barlyǵyn retimen oılastyrǵan jón. Numquraılylyq – jemqorlyqtyń túp tamyry», deıdi halyq qalaýlysy.