Táýelsizdik alǵan jyldardan memleket tarapynan bilim alýǵa, shyǵarmashylyǵyn damytýǵa, eńbektenýge umtylǵan jastardy qoldaý maqsatynda birqatar baǵdarlama men jobalar iske asyrylýda. Olardyń biri QR Tuńǵysh Prezıdenti-Elbasynyń bastamasymen taǵaıyndalǵan «Daryn» memlekettik jastar syılyǵy. Osy jyldar ishinde 294 adam syılyq ıegeri atandy. Bul týraly AQDM Jastar jáne otbasy isteri komıtetiniń tóraǵasy Shahmardan Baımanov málimdedi, dep habarlaıdy Egemen.kz.
«Daryn» memlekettik jastar syılyǵy 1992 jyldan bastap jemisti ǵylymı, shyǵarmashylyq, qoǵamdyq qyzmet, sondaı-aq joǵary sporttyq jetistikteri úshin 10 nomınasııa boıynsha beriledi. «Daryn» syılyǵyna halyqaralyq jáne respýblıkalyq baıqaýlardyń, festıvaldar men kórmelerdiń laýreattary, respýblıkalyq jáne halyqaralyq deńgeıdegi sporttyq jarystardyń júldegerleri men jeńimpazdary úmitker bola alady», dedi Sh.Baımanov.
Aıta keteıik, elimizdiń asqaq týyn álemge jelbiretip tanytqan sportshylarymyz Serik Sápıev, Olga Shıshıgına, Danııar Eleýsinov, Iýlııa Galysheva, óner salasynda ózindik orny bar Dımash Qudaıbergen, «Mýz ART», «Jigitter», «Ulytaý» toptary, klassıkalyq mýzykadan Marııa Mýdrıak, Jibek Mýsýrgalıeva, halyq shyǵarmashylyǵyndaǵy tulǵalar Kúnsulý Túrikpen, Muqııat Asqar, belgili akterler Ádil Ahmetov, Asylhan Tólepov jáne t.b. ónerli jastar ár jyldary «Daryn» memlekettik jastar syılyǵynyń ıegerleri atandy.