Búgin Jambyl oblysynyń ákimi Berdibek Saparbaev Taraz qalasyndaǵy «Mamyr» toǵaıynda aımaqtaǵy daryndy oqýshylarmen kezdesti, dep habarlaıdy Egemen.kz.
Jıynǵa halyqaralyq jáne respýblıkalyq olımpıadalar men ǵylymı jarystarda jeńimpaz atanǵan 98 oqýshy qatysty. Kezdesýde Berdibek Saparbaev memlekettiń bolashaǵy – bilimdi de tárbıeli jastardyń qolynda ekenin basa aıtyp, olardy bilim alý jolynda talmaı izdenýge, aldaǵy ýaqytta elimizdiń órkendeýine óz úlesterin qosýǵa shaqyrdy.
«Bolashaq» memleketttik baǵdarlamasynyń múmkindikterin barynsha paıdalaný kerektigin de jetkizdi. Sondaı-aq, oblys ákimi jastardyń qoıǵan suraqtaryna ashyq jaýap berip, talantty da bilimdi jastarǵa úlken senim artatyndyǵyn jetkizdi. Kezdesý sońynda oblys ákimi daryndy jastarǵa Alǵys hat pen 100 myń teńgeniń sertıfıkatyn jáne jeńimpaz oqýshylardy daıyndaǵan 20 muǵalimge Qurmet gramotasyn tapsyrdy.
Bıylǵy oqý jylynda túrli ıntellektýaldyq oıyndar men pándik olımpıadalarǵa, ǵylymı jarystarǵa qatysqan jambyldyq oqýshylardyń 16842-si jeńimpaz atanǵan. Qazaqstan Respýblıkasynyń Tuńǵysh Prezıdenti – Elbasy Nursultan Nazarbaevtyń «El Úmiti» bastamasy aıasynda aýyl mektepterinde oqıtyn oqýshylardy qoldaýǵa baǵyttalǵan «Myń bala» olımpıadasynyń qorytyndysy boıynsha oblystaǵy 91 oqýshy júldeger atanǵan. Onyń ishinde 5-synypta oqıtyn 33 oqýshy Elbasy Akademııasynyń qashyqtan oqytý mektebinde olımpıadadan keıingi súıemeldeýge ıe bolsa, 6-synyptaǵy 58 oqýshy daryndy balalarǵa arnalǵan mektepterge qabyldandy.
Budan bólek, «Aıqanat» olımpıadasyna qatysyp, jeńimpaz atanǵan 22 oqýshy Býrabaı qalasynda jańadan ashylǵan «IQanat Kazakh-English High School» mektebinde oqýǵa múmkindik aldy. Al, jas urpaqty jan-jaqty damytýdy kózdeıtin ulttyq deńgeıdegi «Elbasy medali» baǵdarlamasyna oblys boıynsha 400-den astam oqýshy qatysyp, 128 oqýshy qola medalmen marapattalǵan eken. Olar 6 aı boıy jeti baǵyt boıynsha tapsyrma oryndap, bilim men sheberlikterin jetildirgen. Sportpen shuǵyldaný, ónerge bet burý, tól murany dáripteý jáne qaıyrymdylyq jasaý men kitap oqýdan synaq tapsyrǵan.
Sonymen qatar, oqý jylynda halyqaralyq pán olımpıadalary men ǵylymı jarystarda jambyldyq daryndy oqýshylar 1032 júldeli oryndy ıelendi. Onyń 216-sy altyn, 369-y kúmis, 447-si qola medal ıegerleri. Al, respýblıkalyq pándik olımpıadalary men ǵylymı jarystarda oqýshylar 1440 júldeli oryndardy ıelense, onyń 357-si altyn, 491-i kúmis, 592-si qola medal. Erekshe atap ótetin jaıt, oblys oqýshylarynan quralǵan komanda respýblıkalyq pán olımpıadasynan jáne ǵylymı jobalar jarysynan 12 jyl qatarynan komandalyq I-oryndy ıelenip, «Eń úzdik komanda» atanyp keledi.
Budan bólek, óńirdegi 8 mektep «100 úzdik mekteptiń» qataryna ense, daryndy er balalarǵa arnalǵan «Bilim-Innovasııa» lıseı-ınternaty «Úzdik olımpıadalyq mektep – 2021» ataǵyn ıelendi. Kezdesý barysynda oqýshylar jetistikteri men aldaǵy josparlary týraly aıtty. Jastardyń bastamasyna qoldaý kórsetip kele jatqan oblys basshylyǵyna alǵystaryn jetkizdi.