Aqtóbede mas kúıinde kólik aıdap, rýlge ıe bola almaǵan júrgizýshi jol apatyna ushyrady. Jol-kólik oqıǵasy kezinde jolaýshy kóz jumdy, dep habarlaıdy Egemen.kz.
Jol apaty Hromtaý aýdanynyń Ońǵar kenti mańynda tirkeldi. Reseı esebinde turǵan «VAZ-2114» avtokóliginiń 50 jastaǵy júrgizýshisi rýlge ıe bola almaı, joldyń sol jaq bóligine aýdarylǵan. Jol-kólik oqıǵasy saldarynan 40 jastaǵy jolaýshy sol jerde kóz jumdy. Al júrgizýshi men taǵy eki jolaýshy túrli jaraqatpen Hromtaý aýdanynyń ortalyq aýrýhanasyna jatqyzyldy. Belgili bolǵandaı, bul adamdar ózen jaǵasynda demalǵan. Júrgizýshi mas kúıinde rýlge otyrǵan.
«Atalǵan fakti Qylmystyq kodekstiń «Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy» baby boıynsha sotqa deıingi tergep-tekserýdiń biryńǵaı tizilimine engizildi. Barlyq qajetti saraptama taǵaıyndaldy. Mas kúıinde kólik basqarý — eń aýyr qylmys dep esepteımiz. Kóbinese qaıǵyly jaǵdaımen aıaqtalady», dep tolyqtyrdy Aqtóbe oblysy PD bastyǵy Atyǵaı Arystanov.