Túrkistan oblysy Leńgir qalasynyń 99 jastaǵy turǵyny Aleksandra Petrovna Kapýstına koronavırýstan emdelip shyqty, dep habarlaıdy Egemen.kz.
Ardagerdi aýrýhana dárigerleri erekshe qoshametpen shyǵaryp saldy. Ardagerge koronavırýs dıagnozy osydan eki apta buryn qoıylǵan.
Naýqastyń dene qyzýy kóterilip, ókpesi qabynyp, álsiregen. Ol shuǵyl túrde Leńgir qalalyq aýrýhanasyna jatqyzylady.
Aýrýhanaǵa naýqas eki jaqty polısegmentarly pnevmonııamen túsken. Dárigerlerdiń jedel júrgizgen emdik sharalarynyń kómegimen eki aptada qarııa koronavırýstan qulan-taza aıyqty.
Densaýlyǵynyń myqtylyǵynyń arqasynda oǵan ókpeniń jasandy dem berý apparaty qajet bolmaǵan.
1922 jyly dúnıege kelgen qart áje – Ekinshi dúnıejúzi soǵysynyń ardageri.
«Gospıtalge óte aýyr halde tústim. О́zimdi nashar sezinip, óte múshkil halde edim. Meni shuǵyl túrde osynda alyp kelip, emdedi. Munda men adamnyń adamǵa degen qamqorlyǵyn sezindim. Barlyq dárigerlerge alǵys aıtamyn», deıdi 99 jastaǵy soǵys ardageri.