Qazaqta «Kúsh atasyn tanymas» degen sóz bar. Uly dalamyzda egeýli naıza qolǵa alyp jaýǵa shapqan batyrlar da, alysqanyn alyp jyqqan balýandar da ótken. Sol tektilerdiń jalǵasyndaı bolǵan azamattar aramyzda búgin de bar. Qazirgi zamannyń Qajymuqany deýge turarlyq Aıbar Erjanov bul kúnde aýyr júk kólikterin jalǵyz ózi súırep, kópti tańdandyrýda. Ol áýeli jol talǵamaıtyn japondyq úsh «Djıp» avtokóligin qatarynan jalǵyz tartyp kóptiń yqylasyna bólense, jýyrda salmaǵy 15 tonna bolatyn aýyr júk kóligin taǵy da jalǵyz súırep erekshe qabiletin tanytty.
Árıne, Aıbardyń bul áreketin qoldaýshylar da, ony baǵalaýshylar da kóp boldy. Áýelgi qoldaýshylary ákesi Turǵanbaı Erjanov pen anasy Kúnbala Ermekova eken. «Anam meniń naǵashylarymnyń óte myqty kisiler bolǵanyn aıtady. Ákem de, anam da eńbekqor adamdar. Ákem qara kúsh jaǵynan myqty kisi», deıdi sportshynyń ózi.
Deıturǵanmen, Aıbar birinshi kezekte muny maqtanysh nemese elge tanylý úshin emes, qazaqtyń qaısarlyǵyn nasıhattaý úshin qolǵa alypty. Ári bıyl áıgili Qajymuqan Muńaıtpasulynyń týǵanyna 150 jyl tolýyna oraı kólik tartýdy uıymdastyrýda. Sarysý aýdany Saýdakent aýylynda qarapaıym otbasynda tárbıelengen Aıbar bala kúninen sportshy bolýdy armandapty. Ýaqyt óte kele ol belesterdi baǵyndyryp, sport áleminde birqatar jetistikke jetken. Jerlesimiz paýerlıftıngtiń 8 túrinen sport sheberi atanǵan. Máselen, 2017 jyly «Klassıkalyq jatyp syǵymdaýdan Qazaqstan Respýblıkasynyń sport sheberi», 2018 jyly «Qazaqstan Respýblıkasynyń sport sheberi», 2019 jyly «Áskerı jatyp syǵymdaýdan Qazaqstan Respýblıkasynyń sport sheberi» ataqtaryna jáne ózge de marapattarǵa qol jetkizgen. «Qazirgi ýaqytta bul sport túri shet memleketterde kóp taralǵan. Bizdiń elimizde sanaýly jigitter ǵana aýyr júk kólikterin tartyp júr. Osydan eki jyl buryn kólik súıreý týraly oıyma kelgen. Alaıda álemdi jaılaǵan indetke baılanysty biraz daıyndyqtar shegerilip qaldy. Biraq bul sharýaǵa fızıkalyq turǵydan daıyn edim. Osy jyldyń basynda qaıtadan daıyndala bastadym», deıdi Aıbar Erjanov. Nátıjesinde, salmaǵy ondaǵan tonna bolatyn aýyr kólikterdi kedergisiz tartyp, kúsh-qýatyn taǵy da dáleldedi.
Qazaq jastaryn otansúıgishtikke baýlý maqsatynda aýyr sport túrimen aınalysyp júrgen Aıbar búginde janyna shákirt jınap, bilgenimen bólisip keledi. Janyndaǵy Baýyrjan Kamalıev, Erjan Jaqaev, Serik Seńgirbaev sııaqty jigittermen birge áli talaı jetistikterge jetýdi josparlaýda. Jol talǵamaıtyn kólikterdi de, aýyr júk kóligin de jalǵyz súıregen Aıbar endi aldaǵy ýaqytta poıyz vagonyn tartýdy da kózdep otyr. Bul da ýaqytynda kópshiliktiń tańdanysyn týdyryp, qyzyǵýshylyǵyn arttyratyn oqıǵa bolatyny sózsiz.
Jambyl oblysy