BUU-nyń gýmanıtarlyq máseleler jónindegi bóliminiń bastyǵy Mark Lýkok Efıopııanyń soltústigindegi Tıgraı aımaǵynda ashtyq bastalǵanyn aıtty, dep habarlaıdy Egemen.kz. Bul jaıynda BBC málimet taratty.
«Qazir ol jerde ashtyq baıqalyp jatyr. Bul jaǵdaı áldeqaıda ýshyǵýy múmkin», dedi resmı ókil.
BUU málimetteri boıynsha, Efıopııada 350 000 adam soǵystan zardap shekken Tıgraı aımaǵynda, sondaı-aq Amhara men Afar ólkelerinde kúrdeli jaǵdaıda ómir súrip jatyr.
Aımaqtaǵy azyq-túlik tapshylyǵy ashtyq pen ólim-jitimniń kóbeıýine ákelýi yqtımal.
Efıopııada eldiń ortalyq úkimeti men Tıgraıdy azat etý úshin halyqtyq maıdan arasyndaǵy qarýly qaqtyǵys jalǵasýda, ol ótken jyldyń qarasha aıynda bastalyp, halyqtyń jaǵdaıyn turalatyp tastaǵan edi.