Shymkent qalasynyń ákimi Murat Áıtenov medısına qyzmetkerleriniń kásibı merekesine oraı sala mamandaryn marapattady, dep habarlaıdy Egemen.kz.
Búginde búkil álem jurtshylyǵy dáriger atty jaýapty da mańyzdy mamandyq ıeleriniń kómegine muqtaj bolyp otyr.
Sebebi jer jahandy jaılaǵan koronavırýs derti kúnnen kúnge údep, san myńdaǵan adamnyń taǵdyryn jalmaǵan qaýipti dertke aınalyp úlgerdi. Osy qarýsyz maıdanda aldyńǵy shepte arpalysyp, adam janynyń arashasy bolyp júrgenderdiń eńbegi orasan zor ekeni belgili.
Osyǵan oraı Shymkent qalasynyń ákimi Murat Áıtenov medısına qyzmetkerleriniń kásibı merekesimen sala mamandaryn marapattady. Medısına salasyna qosqan joǵary úlesi úshin 5 qyzmetkerge Shymkent qalasy ákiminiń alǵys haty, 5 azamatqa «Eńbek ardageri» medali, 8 mamanǵa «Densaýlyq saqtaý isiniń úzdigi» tós belgisi, 5 dárigerge «Densaýlyq saqtaý isine qosqan úlesi úshin» tós belgisi tabystaldy.
- 2020-2021 jyldar medısına salasy úshin óte aýyr boldy. Syn saǵatta medısına qyzmetkerleri ajalmen arpalysyp, aýyr beınettiń ortasynda júrdi. О́tken jyly dárigerler kásibı merekelerin toılaǵan joq. Oǵan múmkindik te bolǵan joq. Sizderge úlken mindetter qoıylyp, sonymen birge memleket tarapynan qoldaý da kórsetilip keledi. Koronavırýs indetine qarsy kúreste jankeshti eńbekterińiz úshin alǵys aıtamyn! - degen shahar basshysy sala úzdikteriniń qyzmetine sáttilik tiledi.
Sonymen qatar Táýelsizdik jyldaryndaǵy medısına salasynyń jetistikterin atap ótti. Densaýlyq saqtaý salasyndaǵy bıýdjet 30 jylda 50,8 mln.teńgeden 79,1 mlrd. teńgege deıin ósken. 3000 birlikten astam medısınalyq tehnıka satyp alynǵan. Búgingi kúni qalanyń medısınalyq uıymdarynyń jaraqtandyrylýy 25,3 paıyzdan respýblıkalyq kórsetkishke 77,5 paıyzǵa deıin jetkizildi. Dárigerler sany 1991 jylǵy 2205 dárigerden 2021 jyly 4205-ke deıin ósti. Ana ólimi 10 esege, náresteler ólim-jitimi 3 esege tómendedi. Týberkýlezden bolatyn ólim-jitim kórsetkishi 100 myń turǵynǵa shaqqanda 7,7-den 0,9-ǵa deıin tómendedi. Nátıjesinde halyqtyń kútiletin orta jasy on jylǵa ósip, 70 jastan asty.
Merekelik shara sońy dárigerler týraly derekti fılm jáne konserttik nómirlermen ulasty.