Búgingi tańda elordada 23 shomylý orny anyqtaldy, alaıda olardyń tek 3-eýine ǵana ruqsat etilgen. Qalǵany ruqsat etilmegen jáne qaýipti bolyp esepteledi, dep habarlaıdy elorda ákimdiginiń resmı saıty.
Shomylý maýsymynda sýdaǵy qaýipsizdik qalaı qamtamasyz etiletini jáne sý aıdyndaryndaǵy jazataıym oqıǵalardyń negizgi sebepteri týraly onlaın-brıfıngte Nur-Sultan qalasy TJD bastyǵynyń mindetin atqarýshy Esen Baıyrov aıtyp berdi.
Spıkerdiń aıtýynsha, Nur-Sultan qalasy TJ departamenti qaıǵyly jaǵdaılarǵa jáne sýda jaraqattanýǵa jol bermes úshin qajetti is-sharalardy qarqyndy júrgizýde.
«Qazirgi ýaqytta Nur-Sultan qalasynda TJD kúshteri men quraldary, 29 qutqarýshy-súńgýir, súńgýirlik jaraqtary bar 2 birlik jedel-qutqarý tehnıkasy, 6 birlik júzý quraly (2 kater, 4 qaıyq) jáne basqa da qutqarý jabdyqtary paıdalanýǵa daıyn. Kún saıyn reıdtik is-sharalarǵa 80-nen astam adam jumyldyrylady. Al demalys jáne mereke kúnderi qyzmetkerler sany artady», dedi Esen Baıyrov.
Reıdtik is-sharalar kezinde elorda turǵyndarymen jáne qonaqtaryna úgit-nasıhat jumystary júrgiziledi.
Sonymen qatar qaýipsizdikti qamtamasyz etý jáne azamattardy aqparattandyrý maqsatynda TJD ákimdikpen birlesip, 140 tyıym salý belgisi, 20 aqparattyq stend jáne 20 júzý belgisi shomylýǵa tyıym salynǵan oryndarda ornatyldy.
«Nur-Sultan qalasynyń sý aıdyndarynda 2020 jyldyń shomylý kezeńinde 5 adam qaza tapty. Bıyl shomylý kezeńi bastalǵanǵa deıin elordanyń sý aıdyndarynda qaıǵyly oqıǵalar bolyp, 3 adam (onyń ishinde 1 bala) qaza tapty. Sýdaǵy jazataıym oqıǵalardyń negizgi sebepteri – tyıym salynǵan jáne jabdyqtalmaǵan oryndarda mas kúıinde shomylý, sondaı-aq balalardy eresekterdiń qaraýynsyz qaldyrý», dep qosty spıker.
Eske sala keteıik, elordada 23 shomylý orny anyqtaldy, onyń 3-eýi ǵana Nur-Sultan qalasy ákiminiń qaýlysyna sáıkes ruqsat etilgen: Ortalyq jaǵajaı, «Trı peskarıa» jáne «Astanalyq aýla» demalys aımaqtary.