Qazaqstan Respýblıkasy Prezıdentiniń janyndaǵy Ortalyq kommýnıkasııalar qyzmetiniń alańynda Jambyl oblysynyń ákimi Berdibek Saparbaevtyń qatysýymen baspasóz konferensııasy ótti. Ákim kezdesýde óńirdiń 2021 jyldyń 5 aıyndaǵy áleýmettik-ekonomıkalyq damý kórsetkishteri men memlekettik baǵdarlamalardyń iske asý barysyna toqtaldy. Sonymen qatar ol Memleket basshysy jáne Úkimettiń qoldaýymen óńirde negizgi áleýmettik-ekonomıkalyq kórsetkishterdiń ósimine qol jetkizilip otyrǵanyn da aıtty.
Aǵymdaǵy jyldyń qańtar-mamyr aılarynyń qorytyndysy boıynsha Jambyl oblysynda ekonomıkanyń ósimi 101,6 paıyzdy qurady. Negizgi kapıtalǵa 421 mıllıard teńge ınvestısııa tartý josparlanǵan. Jyl basynan beri 436 mıllıard teńgege 11 joba iske asyrylýda. Al búginge 74,1 mıllıard teńgege 5 joba oryndalǵan. Sondaı-aq óńirde aǵymdaǵy jyldyń bes aıynda «Eńbek» baǵdarlamasy aıasynda jumyspen qamtýdyń belsendi sharalarymen 23200 adam qamtylǵan. Esepti kezeńde oblysta 16400 jańa jumys orny ashylsa, onyń ishinde 7300 jumys orny turaqty. Osyndaı jumystardyń nátıjesinde jumyssyzdyq deńgeıi 4,9 paıyzdy quraǵan. Sonymen qatar aımaqtaǵy ataýly áleýmettik kómek alýshylardyń sany 69 myńnan 50 myń adamǵa deıin azaıǵan. Oblystaǵy 356 aýyldyq eldi mekenniń 70-iniń turǵyndary ataýly áleýmettik kómek almaıdy. Sondaı-aq Berdibek Saparbaev agroónerkásiptik keshenin damytýǵa óńirdiń qolaıly klımattyq jaǵdaıyn aıta kelip, ásirese egistik alqaptary men jaıylymdyq jerlerdiń bos jatpaýyna aıryqsha nazar aýdarylyp otyrǵanyn jetkizdi. Ákimniń aıtýynsha, oblysta arnaıy ázirlengen kartanyń nátıjesinde paıdalanylmaı jatqan 41,1 myń gektar jer memleket menshigine qaıtarylǵan. Onyń 2,1 myń gektary egistik jerler bolsa, 38,9 myń gektary jaıylym jerler. Sondaı-aq aǵymdaǵy jyly óńirde egistik alqaby 47 myń gektarǵa deıin ulǵaıyp, 768,5 myń gektarǵa jetken.
Brıfıng barysynda Berdibek Saparbaev óńirde balyq óndirisin 2025 jylǵa qaraı 5 myń tonnaǵa deıin jetkizý josparlanyp otyrǵanyn atap ótti. Búgingi tańda oblys aýmaǵynda 142 balyq sharýashylyǵy aıdyndary bolsa, forel balyqtaryn ósirýge arnalǵan 17 taý ýchaskeleri anyqtalǵan. Budan bólek, azyq-túlik taýarlarynyń baǵasyn turaqtandyrý boıynsha da júıeli jumystar atqarylýda. Ol jumystardyń nátıjesiniń bir kórinisi retinde ashylǵan 29 áleýmettik dúkendi aıtýǵa bolady. Qosymsha taǵy osyndaı 12 saýda ornyn iske qosý josparlanýda. Bul oraıda Memleket basshysynyń tapsyrmasyna sáıkes óńirde júzege asyp jatqan «Alqaptan sórege deıin» qanatqaqty jobasynyń mańyzy zor. Ol úshin 1 mıllıard teńge baǵyttalǵan. Atalǵan joba aıasynda azyq-túlik taýarlaryn satyp alýdy turaqtandyrý jáne qamtamasyz etý maqsatynda tórt saýda jelileri anyqtalyp, olarǵa ónimder deldaldarsyz tikeleı jetkizilýde. Berdibek Saparbaev bes aı ishinde oblysta 42 aýyl sharýashylyǵy taýarlarynyń jármeńkesi ótkenin, onda barlyǵy 460 mıllıon teńgeniń 1104 tonna aýylsharýashylyq ónimi ótkerilgenin, ónimder naryqtaǵydan 15-20 paıyzǵa tómen baǵamen satylǵanyn da aıtty. Sondaı-aq óńirlerdi damytýǵa arnalǵan memlekettik baǵdarlamalardyń jemisin jambyldyqtar da aıqyn sezinýde ekenin, ásirese turǵyn úı qurylysy jaqsy qarqynmen júrýde ekenin de jetkizdi. Jyl basynan kúni búginge deıin 204,3 myń sharshy metr turǵyn úı paıdalanýǵa berilse, jyl qorytyndysymen 651 myń sharshy metr turǵyn úı turǵyzý josparlanýda.
Bıyl Memlekettik baǵdarlamalar aıasynda óńirde 424,8 shaqyrym joldar salynyp, jóndeýden ótedi. Nátıjesinde, jaqsy jáne qanaǵattanarlyq jaǵdaıdaǵy joldar úlesi 90 paıyzdan 93,3 paıyzǵa, eldi meken kósheleri 77,2 paıyzdan 79,2 paıyzǵa artady dep kútilýde. Jyl sońyna deıin 44 myń turǵyn turatyn 12 aýyldyq eldi mekenge sý qubyry júrgizilip, qamtylý deńgeıi 88,7 paıyzǵa jetpek. Sol sekildi 20 eldi mekenge gaz tartylyp, gazdandyrý úlesi 83,8 paıyzdy quraıtyn bolady. Berdibek Saparbaevtyń aıtýynsha, oblysta 23 bilim berý ǵımaratynyń qurylysy júrgizilýde. Nátıjesinde, 1 apatty, 3 úsh aýysymdy jáne 2 tozyǵy jetken mektepterdiń máselesi sheshimin tabatyn bolady. Sondaı-aq búgingi tańda 150 myń jambyldyq koronavırýsqa qarsy vaksına qabyldaǵan. О́ńirde S.Asfendııarov atyndaǵy Qazaq ulttyq medısınalyq ýnıversıtetiniń fılıaly ashylyp, Primary Health Care Ulttyq qaýymdastyǵymen yntymaqtastyq týraly memorandým aıasynda 4 ozyq tájirıbe ortalyǵy qurylǵan. Onyń ekeýi Taraz qalasynda bolsa, qalǵan ekeýi Jambyl jáne Merki aýdandarynda ornalasqan. Sol sııaqty, ákim meıirbıke isindegi medısınalyq kómektiń sapasyn arttyrý úshin ınnovasııalyq medısınalyq-áleýmettik tehnologııalar engizilgenin, oblys aýdandary jyljymaly medısınalyq keshenderimen tolyq qamtamasyz etilgenin de aıtyp ótti. Qazaqstan Respýblıkasynyń Tuńǵysh Prezıdenti – Elbasy qorynyń bastamasymen oblysta Jambyl oblystyq kópsalaly balalar aýrýhanasynda 120 tósektik «Qamqorlyq» ońaltý ortalyǵy ashylǵan. Onda búginge deıin 620 bala em qabyldaǵan. Medısınalyq mekemelerdiń materıaldyq bazasyn nyǵaıtýǵa jergilikti bıýdjetten 2,6 mıllıard teńge qarastyrylǵan.
Brıfıngte Jambyl oblysynda júzege asyp jarqyn jobalar týraly da jan-jaqty aıtyldy. Aıtalyq, Memleket basshysynyń tapsyrmasyna sáıkes oblysta qolǵa alynǵan «Beıbitshilik pen kelisim» qanatqaqty jobasy aıasynda 347 azamat turaqty jumysqa ornalasyp, 445 azamatqa medısınalyq kómek kórsetilse, 180 turǵyn qaıtarymsyz grant aldy. Al oblys ákiminiń bastamasymen júzege asyp jatqan «Asarlatyp úı salý» jobasymen byltyr 99 muqtaj otbasy aýyldastarynyń kómegimen baspanaly bolǵan. Aǵymdaǵy jyly taǵy 134 úıdiń qurylysy bastalyp, búginge deıin onyń 14-i paıdalanýǵa berilgen. Osylaısha, jalpy asarlatý ádisimen 2,3 mıllıard teńgeniń 233 úıi salynatyn bolady. Sol sekildi «Jomart túlek» jobasy sheńberinde tabysty túlekterdiń demeýshiligimen 3 STEAM laboratorııasy ashylyp, 3 sport kesheni salynǵan. Taǵy osyndaı 4 keshenniń, 6 densaýlyq saqtaý nysanynyń qurylysy josparlanýda. Jalpy, túlekter tarapynan 2,8 mıllıard teńgege 73 eldi mekende jobalar júzege asady dep kútilýde. Sondaı-aq aǵymdaǵy jyly jalpy bıznestiń áleýmettik jaýapkershiligi qaǵıdattaryn damytý aıasynda «Jomart túlek», «Tarazǵa tartý», «Asarlatyp úı salý» jobalary boıynsha bıýdjet qarajatynan tys 26 mıllıard teńge tartylatyn bolady. Al bıyl óńirde bastaý alǵan «Tarazǵa tartý» jobasy aıasynda oblys ortalyǵynda 42 nysanda abattandyrý jáne jóndeý jumystary júrýde desek, olardyń qatarynda turǵyn úıler men balalarǵa arnalǵan oıyn jáne sport alańshalary, 21 saıabaq pen skver bar. Bul turǵyda barlyǵy 42 jobany júzege asyrý josparlanǵan. Al jýyrda bes nysandaǵy jumystar aıaqtalyp, paıdalanýǵa berildi.
Jambyl oblysy