Búgin, 23 maýsymda Táýelsiz Qazaqstannyń zańnamalyq bazasynyń qalyptasýy men damýyna zor úles qosqan belgili memleket qaıratkeri Qýanysh Mahmutuly Alpysbekov 77 jasqa qaraǵan shaǵynda dúnıeden ótti, dep habarlaıdy Egemen.kz Parlament Májilisiniń baspasóz qyzmetine silteme jasap.
Májilis Tóraǵasy Nurlan Nyǵmatýlın marqumnyń otbasy men jaqyndaryna kóńil aıtty.
«Májilis depýtattarynyń atynan jáne jeke óz atymnan orny tolmas qazaǵa baılanysty marqumnyń otbasyna, týǵan-týystaryna jáne jaqyndaryna kóńil aıtamyn. II saılanǵan Parlament Májilisiniń depýtaty retinde Qýanysh Mahmutuly Alpysbekov otandyq zańnamalyq bazany jetildirýge súbeli úles qosty», dedi Nurlan Nyǵmatýlın.
Sonymen qatar Májilis spıkeri Qýanysh Alpysbekovtiń KOKP OK-de, keıinirek Kólik mınıstrliginde, Aqmola oblysynyń basshylyǵynda, sondaı-aq QR Premer-Mınıstriniń Keńsesinde jaýapty memlekettik laýazymdarda jumys istegen jyldardaǵy joǵary kásibıligine toqtaldy.
«Kórnekti memleket qaıratkeri, keremet tulǵa jáne senimdi dos Qýanysh Mahmutuly týraly jarqyn estelik adamdardyń júreginde máńgi saqtalady», dep atap ótti Májilis spıkeri.