«Abaı-Vern» utqyrlyq bilim berý baǵdarlamasyna qatysý úshin ótinishterdi qabyldaý bastaldy. Baǵdarlama boıynsha 30-dan astam qazaqstandyq magıstrant pen doktarant Fransııada tegin bilim ala alady.
Utqyrlyq baǵdarlamasy koronavırýs pandemııasyna baılanysty moratorıı engizilgennen keıin bir jyl ótken soń qaıta júzege asyryla bastady. Bilim jáne ǵylym mınıstri Ashat Aımaǵambetov pen Fransııanyń Qazaqstandaǵy Elshisi Dıde Kaness franko-qazaqstandyq stıpendııa týraly kelisimge ózgerister engizý týraly hattamaǵa qol qoıdy.
2021-2022 oqý jylynda ekinshi kýrstyń 30 magıstranty jáne Qazaqstan men Fransııadaǵy ǵylymı jetekshilermen birlesip dıssertasııa daıyndaıtyn 5 doktorant «Abaı-Vern» stıpendııasynyń ıegeri atana alady.
«Abaı-Vern» stıpendııasy magıstranttar men doktoranttarǵa fransýz jáne aǵylshyn tilderinde Fransııa ýnıversıtetterinde oqý úshin beriledi. Úmitkerlerdiń fransýz joǵary oqý ornyna nemese ǵylymı-zertteý ortalyǵyna magıstratýra men doktorantýra baǵdarlamalary boıynsha oqýǵa aldyn ala qabyldanǵandyǵy týraly rastaý haty bolýy tıis», dep atap ótti BǴM Halyqaralyq yntymaqtastyq departamenti dırektorynyń mindetin atqarýshy Elmıra Asan.
«Abaı-Vern» stıpendııasyn jeńip alǵan magıstranttarǵa Ulttyq bank baǵamy boıynsha aı saıyn 800 evro, doktoranttarǵa 1200 evro mólsherinde stıpendııa tólenedi. Sondaı-aq stıpendıanttar Fransııadaǵy ýnıversıtet jataqhanasynda oryn alýǵa artyqshylyqty quqyqtarǵa ıe bolyp, uzaq merzimdi stýdenttik vıza jáne fransýzdyq áleýmettik saqtandyrý júıesine tegin tirkele alady.
«Abaı-Vern» akademııalyq utqyrlyq baǵdarlamasy boıynsha qujattardy qabyldaý 2021 jyldyń 4 shildesine deıin jalǵasady. Kandıdattardy irikteýdi franko-qazaqstandyq táýelsiz komıssııa júrgizedi.
«Abaı-Vern» – Bilim jáne ǵylym mınıstrligi men Fransııanyń Eýropa jáne syrtqy ister mınıstrliginiń birlesken stıpendııalyq baǵdarlamasy. Kelisimge qol qoıylǵan kezden bastap 158 qazaqstandyq magıstrant pen doktorant bedeldi «Abaı-Vern» halyqaralyq stıpendııasynyń ıegeri atanǵan.