Qazaqstannyń eńbek sińirgen ártisi, kúmiskómeı ánshi, oblystyq fılarmonııanyń dırektory Kenjeǵalı Myrjyqbaı Uly Otan soǵysyndaǵy Jeńistiń 65 jyldyǵyna arnap Jambyl atyndaǵy drama teatrynda soǵys jáne tyl ardagerlerine arnaıy konsert berdi. Ánshi ásirese jaýyngerlik ánderdi shyrqaǵan kezde qarııalar rıza bolyp, alǵysyn jaýdyrdy.
K. Myrjyqbaı munyń aldynda Halyq Qaharmany, ataqty sazger, kúıshi Nurǵısa Tilendıevtiń mereıtoıyna arnaıy kesh uıymdastyrǵan edi. Oǵan oblystyń belgili ánshileri men halyq aspaptary orkestri, Nurǵısanyń syrly áýenderin aıtýdy unatatyn mádenıet qaıratkerleri qatysqan bolatyn. Jaqyn arady fılarmonııa ártisteri sý tasqynynan zardap shekken Tarbaǵataı aýdanynyń aýyldaryna baryp, taǵy da qaıyrymdylyq konsertin bermek.
Ońdasyn ELÝBAI, Shyǵys Qazaqstan oblysy.