Qysta taýly aımaqtarda qardyń mol túsýiniń nátıjesinde áli kúnge jol jaǵalaýlaryndaǵy “qyzyl sýlar” beı-bereket aǵýda. Qar kóbesi sógilgen saıyn taýly óńirlerdegi qaýipti jaǵdaı jıileı túsýde.
Kerbulaq aýdanynyń taýly aımaǵynda osyndaı tabıǵattyń tosyn minezi baıqaldy. Aýdannyń Cheremýshkına eldi mekenine jaqyn jerde laı kóshkini oryn alyp, uzyndyǵy – 300, eni 200 metr jer opyrylyp túsken. Bul teńiz deńgeıinen 2 myń metr bıiktiktegi “Toqsanbaı taýy” dep atalatyn jotada boldy. Kádimgi jar opyrylyp, laı kóshkininen syrǵyp túsken topyraqtyń kólemi 140 myń tekshe metrdi quraǵan.
Bıikte bir-birine uqsas jaryqtar paıda bolyp, laı topyraq shatqalǵa qulaǵan. Jan-jaqtan jınalǵan sý men laı etektegi eldi mekenge qaýip tóndirýi múmkin bolǵandyqtan, Cheremýshkına eldi mekenindegi sharýa qojalyǵymen aınalysqan bes úıdegi 22 turǵyn mal-janymen túgeldeı qaýipsiz aımaqqa kóshirildi.
Qazir munda kezekshilik uıymdastyrylyp, jaǵdaı jiti qadaǵalanýda. Oblystyq tótenshe jaǵdaılar departamenti mamandarynyń habarlaýynsha oryn alǵan laı kóshkinine baılanysty departament jáne selden qorǵaý mekemesiniń qyzmetkerleri jaǵdaıdy zerttep, qaýiptiń aldyn alý sharalaryn júrgizip, qajetti tehnıkalar jetkizilgenin jáne eldi meken tolyq qaýipsiz aımaqtarǵa kóshirilgenin aıtady. Jer-ananyń tosyn syrynyń neden ekeni ázirge beımálim.
Kúmisjan BAIJAN, Almaty oblysy.