Elorda kúni men Táýelsizdiktiń 30 jyldyǵy qarsańynda Nur-Sultanda qutqarýshylar saıabaǵy ashyldy dep habarlaıdy Egemen.kz.
Qutqarýshylar saıabaǵynyń ashylý saltanatyna elorda ákimi Altaı Kólginov, QR TJ mınıstri Iýrıı Ilın, TJ departamenti elordalyq garnızonynyń basshylyǵy men jeke quramy, azamattyq qorǵaý organdarynyń ardagerleri, órt sóndirý kezinde qaza tapqan batyrlardyń týystary qatysty.
Qutqarýshylar saıabaǵynyń aýmaǵy balalar men eresekterge arnalǵan aımaqtarǵa bólingen. Qala turǵyndaryna arnalǵan demalys aımaǵy bar. Oǵan qosa, azamattyq qorǵaý qyzmetiniń úzdikterine arnalǵan qurmet taqtasy ornatylǵan. Qutqarshylar saıabaǵy A. Iаnýshkevıch pen A. Pýshkın kósheleriniń qıylysynda ornalasqan. Saıabaq órt sóndirýshi-qutqarýshylar men qyzmettik mindetin oryndaý kezinde qaza tapqandar qurmetine abattandyrylǵan.
Sondaı-aq, aýmaqta 1964 jyly shyqqan AS-30 MAZ 205 arnaıy órt sóndirý mashınasy tur. Buǵan deıin bul kólikti qazaqstandyqtar Elbasy jaıly fılmnen kórgen.
«Saıabaqta 150-ge jýyq aǵash otyrǵyzyldy. Aýmaqty áli de damyta túsemiz. Biz úshin qala turǵyndarynyń bos ýaqytyn paıdaly ótkizetin oryndar sanyn arttyrý mańyzdy. Bıyl 150 aýla men 40 qoǵamdyq keńistik (saıabaqtar, gúlzarlar, jelekjoldar) salamyz. Jalpy alǵanda, 70-ke jýyq aýla men qoǵamdyq keńistiktiń jumysy aıaqtalyp, ashylǵaly tur. Memleket basshysynyń tapsyrmasy boıynsha abattandyrý kezinde kógaldandyrýǵa erekshe kóńil bólinedi», dedi elorda ákimi Altaı Kólginov.
Byltyr Nur-Sultanda 76 gektar aýmaq abattandyryldy.