Shymkent qalasynda Táýelsizdiktiń 30 jyldyǵy men Elorda kúni merekesi aıasynda birqatar ındýstrıaldy jáne aýyl sharýashylyǵy jobalary iske qosyldy, dep habarlaıdy Egemen.kz.
Qala ákimi Murat Áıtenov onlaın formatta ótken jańa óndiris oryndarynyń ashylý rásimine qatysty. Qala basshysy shahardyń ekonomıkalyq áleýetin arttyrýǵa qosyp otyrǵan úlesteri úshin kásipkerlerge rızashylyǵyn bildire otyryp, jańa kásiporyndardyń eńbek ujymdaryna tabystar tiledi.
Iske asqan jobalar el Táýelsizdigin nyǵaıtýǵa úles qosyp, Shymkent qalasynyń Elordaǵa jasaǵan merekelik tartýy sanalady.
Jańa óndiris jelilerin iske qosýǵa 6,2 mlrd. teńge ınvestısııa tartyldy. Kásiporyndarda 344 jańa jumys oryndary ashylyp otyr.
Iske qosylǵan kásiporyndardyń ishinde 6 joba ındýstrıaldy óndiris oryndary bolyp tabylady. Olardyń ishinde metall jáne temir buıymdary, korpýstyq jıhaz, avtomobıl shynylary, halyq tutynatyn taýarlar, jeńil ónerkásip jobalary iske asty.
Aýyl sharýashylyǵy salasynda 5 joba jumysyn bastady. Agrarlyq salada jylyjaı sharýashylyǵy iske qosylsa, mal sharýashylyǵynda irimshik jáne sút ónimderi, mıneraldy sý sehtary, taýarly sút fermasy, mal sharýashylyǵy jobalary júzege asty.
Aıta ketý kerek, qazirgi kezde Shymkent qalasynyń ónerkásip salasynda 700-den astam kásiporyn belsendi túrde qyzmet atqarady.
О́nerkásip salasynyń úlesi jalpy óńirlik ónim kóleminiń tórtten birin quraıdy. Byltyrǵy jyldyń qorytyndysymen qalanyń ónerkásip salasynda 654,2 mlrd. teńgeniń ónimi óndirilgen.
Táýelsizdik jyldary ishinde Shymkent qalasynyń ekonomıkasyna 2,5 trln. teńgeniń ınvestısııasy tartylsa, shet eldik ınvestorlardyń qatysýymen 2,3 mlrd. AQSh dollaryn quraıtyn 17 joba júzege asty.