Elorda kúnin merekeleýge oraı 5 jáne 6 shilde kúnderi «Astana Opera» memlekettik opera jáne balet teatry qala turǵyndary men qonaqtaryna mýzykalyq syı jasady. Olar eki kún qatarynan «Don Paskýale» operasy men gala-konsert ótkizdi. Oǵan otandyq ártister de, bes eldiń halyqaralyq deńgeıdegi sheteldik oryndaýshylary da qatysty, dep habarlaıdy Nur-Sultan ákimdiginiń resmı saıty.
Konsertterdi elorda ákimdigi men QR Mádenıet jáne sport mınıstrligi uıymdastyrdy.
Sonymen kórermender Gaetano Donısettıdiń eki aktili «Don Paskýale» operasyn tegin tamashalady.
Qoıylymnyń basty partııalaryn qoıǵandar:
Norına – Lıbýshe Santorısova (Chehııa);
Ernesto – Esýo Doı (Japonııa);
Malatesta – Alekseı Shapovalov (Reseı);
Don Paskýale – Antýan Bernheım (Shveısarııa);
Karlıto – Erulan Kamel oryndady.
Dırıjer — Korrado Valvo (Italııa).
«Halyqaralyq deńgeıdegi, asa talantty ánshilermen alǵash ret jumys istep otyrmyn. Mundaı qoıylymdarda, ásirese ashyq dalada ánshiler men orkestr arasynda durys tepe-teńdikti tabý qıyn», dep maestro Korrado Valvo (Italııa) óz áserimen bólisti.
Aıta keteıik, ártister kelesi kúni halyqaralyq qurammen birge amfıteatrda Gala-konsert qoıdy. Sahnada tanymal operalyq arııalar men dýetter, qazaqstandyq avtorlar men batys eýropalyq klassık-kompozıtorlardyń aspaptyq jáne hor shyǵarmalary oryndaldy.
Baǵdarlamany uıymdastyrýshylar sanıtarlyq talaptar men normalardyń saqtalýyn qatań qadaǵalady. Kórermender stendterge tek betperde taǵyp, Ashyq júıesi arqyly kirgizildi.