Keshe Qazaqstannyń Memlekettik hatshysy – Syrtqy ister mınıstri Qanat Saýdabaev Avstrııa Respýblıkasynyń syrtqy ister mınıstri Mıhael Shpındeleggermen telefon arqyly sóılesti, dep habarlady SIM-niń baspasóz qyzmeti.
Áńgimelesýshiler EQYU sheńberinde jáne ekijaqty negizdegi qarym-qatynastardyń keń aýqymdy máselelerin talqylady.
M.Shpındelegger Qyrǵyzstanda oryn alǵan saıası daǵdarysqa qatysty halyqaralyq qoǵamdastyqtyń áreketin úılesimdi atqarýǵa Qazaqstannyń úlesi zor bolǵanyn erekshe atap ótti jáne elimizdiń EQYU-ǵa tóraǵa memleket retindegi qyzmetine joǵary baǵa berdi.
Avstrııanyń syrtqy saıasat vedomstvosynyń basshysy bıyl 16-17 shilde kúnderi Almatyda ótetin Uıymǵa múshe memleketter Syrtqy ister mınıstrleriniń beıresmı keńesine qatysatynyn rastady. Ol sondaı-aq bıyl Prezıdent Nursultan Nazarbaevtyń bastamasymen ótkiziletin EQYU Sammıtin uıymdastyrýda Qazaqstan jaǵy atqaratyn jumystarǵa óz qoldaýyn bildirdi.
Avstrııa Respýblıkasynyń Prezıdenti H.Fısher laýazymyna qaıta saılanýyna baılanysty Qazaqstan tarapynyń quttyqtaýyn joldaı otyryp, Q.Saýdabaev Elbasynyń Avstrııa basshysyna Qazaqstandy ózine yńǵaıly merzimde kelýine shaqyrýyn jetkizdi, ári mundaı sapar ekijaqty yntymaqtastyqqa jańa serpin bere alatynyna senimdi ekenin aıtty.
Qazaqstan Avstrııanyń TMD elderimen ekijaqty saýda kólemi jaǵynan úshinshi oryndy ıelenedi. Qazaqstan men Avstrııanyń ekijaqty saýda aınalymy 2010 jyldyń qańtar-aqpan aılarynda 481,8 mıllıon AQSh dollaryn qurady, al bul daǵdarystyń yqpaly asa kúshti bolǵan 2009 jyldyń sáıkes merzimimen salystyrǵanda 15,5 ese artyq bolyp tabylady. Jalpy alǵanda, sońǵy 15 jyldyń ishinde ekijaqty saýda aınalymynyń kólemi 12 ese ósti. Avstrııaǵa qazaqstandyq eksport – 17 ese, al Avstrııadan Qazaqstanǵa keletin ımport 6 ese ósti.