200-den astam qazaqstandyq Vengrııanyń jetekshi joǵary oqý oryndarynda tegin bilim alady. Osyndaı múmkindik QR Bilim jáne ǵylym mınıstrligi men Vengrııanyń Adamı resýrstar mınıstrliginiń kelisimderiniń arqasynda týyndady, dep habarlaıdy Egemen.kz BǴM baspasóz qyzmetine silteme jasap.
«Bizdiń otandastarymyz «Stipendium Hungaricum» stıpendııalyq baǵdarlamasy boıynsha oqıtyn bolady. Bul tizimdi vengr tarapy úmitkerlerdiń mamandyq tańdaýyna degen yntasyna, olardyń teorııalyq bilimi men oqýdaǵy nemese tańdaǵan salasyndaǵy jetistikterine súıene otyryp bekitti. Sondaı-aq áńgimelesý kezinde kandıdattardyń jeke qasıetteri eskerildi», dep atap ótti QR BǴM Halyqaralyq baǵdarlamalar ortalyǵy prezıdentiniń m.a. Danııar Muqıtanov.
Stıpendıattar Vengrııada bakalavrıat, magıstratýra jáne doktorantýra baǵdarlamalary boıynsha qabyldaýshy taraptyń esebinen oqıtyn bolady. Sonymen qatar 70-ten astam adamnan turatyn rezervtik tizim jasaldy. Barlyq úmitkerlerdiń tizimi Halyqaralyq baǵdarlamalar ortalyǵynyń resmı saıtynda jarııalanǵan.
Aıta keteıik, úkimetaralyq kelisimder aıasynda 330 qazaqstandyq álemniń jetekshi joǵary oqý oryndarynda, onyń ishinde Vengrııa, Polsha, Qytaı, Ýkraına, Slovakııa, Ázirbaıjan jáne Vetnam ýnıversıtetterinde tegin oqı alady.