QR Bilim jáne ǵylym mınıstri Ashat Aımaǵambetov memlekettik bilim berý granttary ıegerleriniń tizimi shyǵatyn merzimdi atady, dep habarlaıdy Egemen.kz.
«Bilim berý granttaryn taǵaıyndaý jónindegi respýblıkalyq komıssııanyń birinshi otyrysy ótti. Otyrysty orynbasarym Qýanysh Erǵalıev ótkizdi. Qazir komıssııa otyrysy ótip jatyr. Tamyzdyń 15-ine deıin bul jumys aıaqtalady dep kútilýde. Sodan keıin ádettegideı taǵaıyndaý qorytyndysyn jarııa etetin bolamyz», dedi Ashat Aımaǵambetov otandyq ınternet basylymǵa bergen suhbatynda.
Aıta ketsek, bıyl Prezıdent tapsyrmasymen granttardyń jalpy sany 5 myńǵa artyp otyr. Iаǵnı, ótken jyly bilim berý granttarynyń sany 51 myń bolsa, bıyl 56 myńǵa deıin artty.
Memlekettik granttardy bólý kezinde alǵash ret azamattardyń áleýmettik osal sanattary úshin kvotalar kózdelgen. Osy jyly bilim berý granttaryn taǵaıyndaý konkýrsyna qatysý úshin barlyǵy 75 myńnan astam ótinim berildi. Bul 2020 jylmen salystyrǵanda 13 myńǵa artyq.