Keshe Nur-Sultan qalasynda Qazaqstan Respýblıkasynyń Ekologııa, geologııa jáne tabıǵı resýrstar mınıstri Maǵzum Myrzaǵalıev Reseı Federasııasynyń Tabıǵı resýrstar jáne ekologııa mınıstri Aleksandr Kozlovpen kezdesti.
Kezdesý barysynda taraptar Oral jáne Ertis transshekaralyq ózenderi basseınderiniń ekojúıelerin saqtaý jáne qalpyna keltirý jónindegi Qazaqstan-Reseı yntymaqtastyǵynyń baǵdarlamalaryn iske asyrý barysyn talqylady. Olardyń iri ózender basseınderinde (Oral, Ertis jáne t.b.) zertteýler júrgizý boıynsha biryńǵaı Jol kartasynda kózdelgen 17 is-sharanyń 10-y 2021 jyly bastaldy, onyń 4-i jyl sońyna deıin aıaqtalady. Qalǵany 2022 jyly bastalady.
Taraptar biryńǵaı Jol kartasynyń is-sharalar kestesin iske asyrý boıynsha mindettemelerdi oryndaý sheńberinde, sondaı-aq zertteýlerdiń derekterimen almasý maqsatynda aqparat almasýdy júrgizdi. Jumys kestesine sáıkes birinshi jartyjyldyqta gıdrologııalyq derekterdi jınaý jáne almasý boıynsha is-sharalar oryndaldy. Taraptar osy baǵyttaǵy jumysty jalǵastyrýǵa kelisti.
Taraptar Pavlodar oblysynyń (Bylqyldaq jınaqtaýshy sý qoımasy aımaǵynda) jáne Omby oblysynyń (Olhovka aýylynda) aýmaǵyndaǵy Ertis ózeniniń jáne jerasty sýlarynyń sapasyna birlesken monıtorıng uıymdastyrýǵa kelisti.
Sondaı-aq taraptar sarapshylardyń turaqty jumys kezdesýlerin ótkizýdiń jospar-kestesin bekitýge kelisti. Máselen, bıylǵy qyrkúıek aıynda Jaıyq (Oral) transshekaralyq ózeni basseıniniń ekojúıesin saqtaý jónindegi Qazaqstan-Reseı komıssııasynyń 3-shi otyrysy ótedi.
Reseı tarapy Ertis ózeniniń transshekaralyq sý resýrstaryn bólý týraly qujat ázirleýdi usyndy. Qazaqstandyq tarap qazirgi ýaqytta Joǵarǵy Ertis sý qoımalary kaskadynan sý aǵyzý ekonomıkanyń barlyq salalarynyń múddeleri eskerilgen «Oba jáne Ertis ózenderiniń sý resýrstaryn keshendi paıdalaný jáne qorǵaý» shemalarynyń erejesine sáıkes keletinin atap ótti.
Sondaı-aq taraptar memleket basshylarynyń qatysýymen (2021 jyl, Kókshetaý qalasy) ótetin «Ekologııa jáne jasyl damý salasyndaǵy yntymaqtastyq» taqyrybynda Reseı men Qazaqstan arasyndaǵy XVII aımaqaralyq yntymaqtastyq forýmyna daıyndyq máselelerin talqylady.
«Egemen-aqparat»