Nur-Sultan qalasynyń ákimi Altaı Kólginov qala turǵyndarynyń kóbeıýine baılanysty turǵyn úı qurylysyna qatysty josparlarymen bólisti, dep habarlaıdy Egemen.kz.
«Halyq sanynyń ósýine baılanysty bizde qurylys jumystarynyń, ásirese turǵyn úı boıynsha kólemi qarqyndy ósýde. 2019 jyly 1,8 mıllıon sharshy metr turǵyn úı, 2020 jyly 3 mıllıon sharshy metr turǵyn úı salyndy, 2021 jylǵy jospar boıynsha 3,2 mıllıon sharshy metr turǵyn úı turǵyzý kózdelgen», dedi Altaı Kólginov máslıhattyń kezekten tys sessııasynda.
Onyń aıtýynsha, bul - úlken jumys kólemi.
«Bul - qosymsha jumys oryndary, salyqtar, qurylys ındýstrııasynyń damýy, jergilikti qamtý. Bizdiń qurylys materıaldaryn nemese basqa komponentterdi, sondaı-aq taýarlar men qyzmetterdi shyǵaratyn jumys kásiporyndarymyz memlekettik bıýdjet esebinen ǵana emes, jeke ınvestısııalar esebinen de kóptegen tapsyrys alady. Qurylys jumystarynyń osy kóleminiń 80%-dan astamy - jeke ınvestısııalar», dep atap ótti ákim.
«Birinshiden, bul bizdiń qalamyzdyń ekonomıkalyq dınamıkasyna – salyq túsimine, jańa jumys oryndaryn qurýǵa, óndiristi damytýǵa jáne taǵy basqasyna oń áser etedi. Sondyqtan 3,2 mıllıon sharshy metr turǵyn úıdi jylýmen, sýmen, kárizben, ınjenerlik jelilermen qamtamasyz etip, abattandyrý qajet», dep túıindedi Altaı Kólginov.