Býrabaıdaǵy “Jasyl orman” shıpajaıy ónegeli isterimen jurtshylyq nazaryn aýdaryp keledi. Máselen, 80 adamdyq ujym óziniń bıylǵy qyzmetiniń basty baǵyty Uly Jeńistiń 65 jyldyǵyna arnalǵandyǵyn aıshyqty kórsete bilýde.
– Biz kóktemgi-jazǵy maýsymda Soltústik Qazaqstan oblysynyń 400 turǵynyna qyzmet kórsetýdi mindetimizge alǵanbyz, –deıdi shıpajaı dırektory Dúısenbek Amanjolov. – Jýyrda alǵashqy 40 qonaǵymyz qonystandy. Olardyń barlyǵy soǵys jáne eńbek ardagerleri. Daıyndyq jumystaryn erte bastap, barlyq qolaıly jaǵdaılarmen qamtamasyz etýge tyrystyq, tipti jıyrma jyldan beri jumys istemeı turǵan lıftti de qozǵalysqa qostyq. Ardagerlerimiz em-domnyń 40 jáne týrıstik marshrýttardyń 19 túrin paıdalana alady.
Kezekti issapar barysynda “Jasyl ormanǵa” bizdiń de jolymyz túsken. Bul kúni Jeńistiń 65 jyldyǵyna arnalǵan erkin kúresten aımaqtyq jarys qyzyp jatyr eken. Oǵan Aqmola, Soltústik Qazaqstan oblystary men Astana qalasynyń 170 balǵyn sportshysy qatysyp, bes salmaq dárejesinde baq synasty. Jarystyń bas tóreshisi Bolat Ábdildın birinshi ret ótkizilip otyrǵan saıysta Soltústik Qazaqstan oblysynyń Ýálıhanov jáne Taıynsha aýdandarynyń, Aqmola oblysynyń Esil jáne Astrahan aýdandarynyń ókilderi erekshe kózge túskenin aıtty.
Al, tanymal bapkerlerdiń biri KSRO chempıony Bekim Japarov eki kúnge sozylǵan jarystyń tárbıelik máni zor ekendigin atap kórsetti. Jarysty uıymdastyrý shyǵynyn óz moınyna alǵan shıpajaı basshylyǵy aýyl balalaryna umytylmas qýanysh syılady. Onyń ashylýynda demalýshy soǵys jáne eńbek ardagerleriniń aq batasyn berýi balǵyn sportshylardy qanattandyrǵany anyq. Úzdik balýandarǵa shıpajaıdyń arnaıy tósbelgileri tapsyrylyp, syı-sııapattar úlestirildi.
Baqbergen AMALBEK, Aqmola oblysy.