Qazir elimizdi daǵdarystan keıin damytý jolynda teńdestirilgen saıasattyń qajettigi burynǵydan da mańyzdyraq. Meniń oıymsha, ekonomıkadaǵy túpki nátıjege, halyqtyń ál-aýqatyn arttyrýǵa baǵyttalǵan dál osyndaı baǵdarlamany el Prezıdenti Q.K.Toqaev keshe óziniń Joldaýynda jarııalady.
Prezıdenttiń ónerkásiptik saıasatty qalyptastyrý jónindegi paıymyn erekshe atap ótkim keledi. Aýyl sharýashylyǵynyń álsiz tustary dál anyqtalǵan.
Bıylǵy jyly Úkimet fermerlerdiń onsyz da az tabysyn tyıym salý sharalarymen tómendetpeýi óte mańyzdy. Aýyl sharýashylyǵy mınıstrligi aýyl sharýashylyǵyn damytýmen, fermerlerdiń kiristerin arttyrýmen aınalysýy kerek, kerisinshe emes! Sondyqtan Prezıdent azyq-túlik taýarlarynyń baǵasyn baqylaý boıynsha memlekettik organdardyń jaýapkershiligin ajyratý kerektigin durys aıtty.
Sondaı-aq elimiz úshin strategııalyq mańyzdy sheshim – bıologııalyq qaýipsizdik jónindegi ulttyq júıe qurýdy da aıtyp ótti. Koronovırýs pandemııasy bul másele boıynsha aldyn ala ispen qamdaný kerek ekenin dáleldedi.
Memleket basshysy sıfrlyq tehnologııalardy endirý arqyly sý problemalaryn sheshý qajettigine basa nazar aýdardy. 2025 jylǵa qaraı elimizdiń barlyq halqy sapaly aýyz sýmen qamtamasyz etiletini mańyzdy.
Meniń oıymsha, qoǵam Prezıdenttiń eldegi eń tómengi jalaqyny 60 myń teńgege deıin, ıaǵnı 30%-ǵa deıin kóterý týraly bastamasyn jaqsy qabyldady. Bul bizdiń mıllıondaǵan azamattarymyzdyń ómir súrý deńgeıin arttyrýǵa baǵyttalǵan Memleket basshysynyń mańyzdy sheshimi.
Senat depýtaty retinde men Úkimet aldynda birneshe ret sóz sóılep, BAQ-ta ǵylymı jobalardy qarjylandyrý merzimin 3 jyldan 5 jylǵa deıin jáne odan da kóp ýaqytqa uzartý qajettigi týraly jazyp ta júrdim. Bul máseleni kóptegen jyl boıy ǵalymdarymyz kótergen bolatyn. Memleket basshysy ǵylymı granttardy júzege asyrý merzimin bes jylǵa deıin ulǵaıtýdy tapsyrdy. Bul otandyq ǵylymnyń damýyna jaqsy serpin bolady dep oılaımyn.
Osylaısha, eldiń áleýmettik-ekonomıkalyq damýynyń basymdyqtary aıqyndaldy. Endi Prezıdent aıtqandaı, «...bizdiń damýymyzdyń sheshýshi kezeńi bastaldy jáne memlekettik apparat biryńǵaı tetik retinde jumys isteýge mindetti. Tek osyndaı jaǵdaıda ǵana biz alǵa qoıǵan maqsattarymyzǵa jetýdi qamtamasyz etemiz».
Aqylbek KúrIshbaev,
Senat depýtaty