Pedagogtiń kásibı damýynyń jańa modeli qurylady. Bul týraly Memleket basshysynyń Joldaýynda berilgen tapsyrmalardy oryndaýǵa arnalǵan Úkimet otyrysynda Bilim jáne ǵylym mınıstri Ashat Aımaǵambetov málim etti, dep habarlaıdy Egemen.kz.
«Prezıdent Joldaýynda aıtylǵandaı, pedagogterdiń biliktiligin arttyrý kezeńin «úsh jylda bir ret» ótkizý boıynsha kásibı damýdyń jańa modeli qurylady. Sondaı-aq «Bilim týraly» Zańǵa qajetti ózgerister engiziledi», dedi A. Aımaǵambetov.
Onyń aıtýynsha, pedagogter kýrstarmen tegin qamtamasyz etiledi.
«Prezıdentimiz aıtyp kórsetkendeı, pedagogter arnaıy biliktilik kýrstarymen tolyǵymen qamtylmaı, óz qarajaty esebinen ótýge májbúr bolǵan. Endi Memleket basshysynyń tapsyrmasy aıasynda pedagogter kýrstarmen tegin qamtamasyz etiletin bolady», dedi mınıstr.