Aqjaıyq aýdanynyń ákimdigi Uly Jeńistiń 65 jyldyǵyna 500 danamen “Maıdangerler” jáne 300 danalyq “Bozdaqtar” kitabyn shyǵardy.
Buǵan deıin aqjaıyqtyqtar 2008 jyly aýdan ensıklopedııasynyń tolyqtyrylǵan II basylymyn, sonymen qatar “Juban eli”, “Aqjaıyq órenderi” atty túrli-tústi dúnıelerdi jurtqa usynǵan edi.
Mine, jamaǵatty jadyratqan is jalǵasyn taýyp otyr. Aýdan ákimi Abaı Imanǵalıevtyń bastamasymen shyǵarylǵan bul dúnıelerde aýdan jeńis sarbazdarynyń ǵumyrnamalyq derekteri, sırek fotosýretteri, memlekettik jáne otbasylyq muraǵattardan materıaldar molynan qamtylǵan. Aıtalyq, “Maıdangerler” kitaby 360 betten turady. Munda “Aýdan 1938-1945 jyldarda”, “Eshkim de, eshnárse de umytylmaıdy”, “Qanatyn ot sharpyǵan qarlyǵash-hattar. Maqalalar”, “Oblys boıynsha Keńes Odaǵynyń Batyrlary”, “Halyq qaharmany” ataǵynyń, I, II, III dárejeli Dańq ordenderiniń tolyq ıegerleri”, “Estelikter” atty taraýlar bar. Soǵys jyldary áskerge attanǵan 11209 jaýyngerdiń 4980-i urys dalasynan oralmady. Kitaptarda Otan úshin otqa túsken jeńimpazdardyń erligi, eńbegi, amanaty kórinis tapqan.
Temir QUSAIYN, Batys Qazaqstan oblysy.