23 qańtar kúni Qyrǵyzstan shekara aýmaǵynda joıylǵan qaraqshylar ıngýsh separatıstik uıymyna músheler bolýy yqtımal. Bul týraly «Interfaks» agenttigine silteme jasaǵan Ras.kz habarlady.
«Qańtardyń 23-i kúni Qyrǵyzstan shekarasyna basyp kirgen 11 adamnan turatyn sodyrlar ıngýsh separatısteri bolýy múmkin degen boljam basym bolyp tur», – dedi Qyrǵyzstan memlekettik shekara qyzmeti raıysynyń mindetin atqarýshy Raıymberdı Dýıshembıev.
Arnaıy operasııanyń barysynda óltirilgen árbir sodyrdyń janynda pyshaq, 15 metrlik arqan, azyq-túlik zapastary, qurma, bal, aýystyryp kıetin aıaqqkıim, Quran, óle qalsa denelerin oraıtyn mata bolǵan. Budan basqa, beınekamera da bolypty. Biraq baılanys quraldary kórinbegen.
«Atalmysh oqıǵadan keıin, 23 qańtardan beri Qyrǵyzstan men Qytaı shekarasyndaǵy tártip kúsheıtildi», – dedi R.Dýıshembıev.
Onyń aıtýynsha, sodyrlar tobyn birinshi bolyp eger Aleksandr Barykın kezdestirgen. Ormanshy olardy toqtatpaq bolǵan. Sol úshin ózi aıaýsyz óltirilgen. Onyń basy kesilip alynypty.
«A.Barykın ne bolǵanyn shekarashylarǵa habarlap úlgerdi. Ol óler aldynda da erlik kórsetti: qaza tappas buryn eki qaraqshyny ala ketti. Ol memlekettik nagradaǵa usynylatyn bolady. Al jerleý rásimi barlyq qurmetimen Ystyqkól oblysynyń ortalyǵy Qaraqol qalasynda ótedi», – dedi R.Dýıshembıev.
Shekara áskerleri bastyǵynyń mindetin atqarýshynyń sózine qaraǵanda, sodyrlardyń Qyrǵyzstan aýmaǵyna qarý-jaraq alý úshin ne terakt jasaý úshin kelgen bolýlary múmkin.
«Olardyń bizdiń bir adamymyzdy óltirip qoıǵanyn eskerip, jergilikti jurtqa úlken qaýip tóndiretinin bildik. Sondyqtan qarańǵy túskenshe bárin joıýǵa sheshim qabyldadyq. Sebebi, 4-4,5 shaqyrym bıiktegi taýda túnde aýa temperatýrasy 35-40 gradýsqa deıin tómendeıdi. Onyń ústine, olar bizdiń berilý jónindegi shartymyzdy qabyldamady. Kelissóz júrgizý barysynda «Allah Akbar!» dep aldy da, shekarashylarǵa karabınnen oq jaýdyrdy», – dedi R.Dýıshembıev.
Aıdar О́risbaev.
Derekkóz: Ras.kz
Foto: Topwar.ru