ORTAQ IGILIKTERDI SAQTAÝ — BARShAMYZDYŃ MINDETIMIZ

1 Mamyr merekesin biz memle­kettik merekeler qatarynda qaldy­ryp otyrmyz, óıtkeni, ol halyq­tyń tól merekesine aınaldy. Ary-beriden soń bul Naýryz mereke­siniń zańdy jalǵasy ispettes. Qazaqstan halqynyń birligi kúniniń erekshe atalyp ótýiniń ózi qoǵamy­myzdyń nyǵaıyp, qalyptasyp bolǵanyn kórsetedi. Qazaqstan halqynyń birligi kúnin erekshe áspetteý elimiz úshin ne beredi degenge kelsek, ázirge Qazaqstan halqyn qazaqtildiler men orystildiler dep sanamasa, eshkim eshkimdi ultyna jáne basqa da erekshelikterine qarap bólip jatqan joq. “Men eshqaıda ketpeı, Qazaqstanda qaldym, sondyqtan maǵan erekshe kózqaras kerek”, deıtin ýaqyt ta áldeqashan ótip ketken. Elden ketkender ketip, qalǵandary qazaqstandyq bolyp qalyp, qoǵam ornyǵa bastady. Kóp ultty halyqtyń tarıhy da bir. Biz kóptegen qıyndyqtardan birge óttik. Ásirese, qazaq halqy­nyń basynan ótkergen qıyndyq­tary jeterlik, sonyń ishinde joń­ǵarlarmen soǵys aýyr tıgeni bar­shamyzǵa aıan. Qaısar halyq elin, jerin aman alyp qaldy. Táýelsizdik alýymyzdyń ózi kezekti tarıhı kezeń. Keńestik kezeńnen qalǵan ekonomıkany jańa satyǵa kóterý­diń ózi ońaı bolǵan joq... Negizgi maqsatymyz – damyǵan ekonomıkasy bar, turaqtylyǵy myǵym Qazaqstan qurý. Turaqty­lyqty saqtaı otyryp, urpaǵy­myzǵa, bala-shaǵamyzǵa artymyzda damyǵan, órkendegen el qaldyrýy­myz kerek. Táýelsizdik alǵannan keıingi jyldary Memleket basshy­sy Nursultan Nazarbaev etnosara­lyq qarym-qatynastardy ary qaraı damytýǵa erekshe mańyz ber­di. Bul – qajet úderis edi. Qazaq tili men mádenıetin órkendetýmen qatar, ózge etnostardyń tól tili men mádenıetin nazardan tys qal­dyr­maý máselesi de sol kezderde qoldaý tapty. Osy maqsatpen 1995 jyly Qazaqstan halyqtarynyń (keıin halqy dep atalatyn boldy) Assambleıasy qurylǵany belgili. 2007 jyly Konstıtýsııaǵa engizil­gen ózgeristerge sáıkes, elimiz joǵarǵy zań shyǵarýshy organyna Assambleıadan ár túrli etnostardyń ishinen saılanýǵa 9 oryn berildi. Sonyń ishinde ózimniń de bar ekenimdi aıta ketýim kerek. Osy rette qaı etnostan saılan­ǵan depýtat solardyń múddesin kúıt­tep ketedi, degen de jańsaq pikir­ler týyndady. Bul oraıda Memleket basshysy Assambleıadan saılanǵan depýtattar eshqandaı ulttyń múddesin qorǵamaıdy, birtutas halyqtyń qamyn qarastyratyn bolady degendi ashyp aıtty. Qazir Assambleıa janynan sarapshylar keńesi qurylyp otyr. Jalpy, munda sońǵy jyldary sarapshylar men ǵalymdar tartylyp, onyń jumysyn jańa deńgeıge kóterdi. Meniń paıymymsha, Assambleıa óskeleń urpaq tárbıesine erekshe den qoıýy kerek. Jastar óz eliniń patrıottary bolýy tıis. Árıne, otansúıgishtik otbasylyq tárbıe­den bastalýy kerektigi aıtpasa da túsinikti. Sol sekildi týǵan jerge degen qurmet te memlekettik tildi bilýden bastalady. Ony bilý talap turǵysynan qolǵa alynǵany jón. Eresek jasta qalaı úırenemiz degender de bar. Biraq men olarǵa únemi aıtyp júremin, eger tildi úırene almasań da dástúr men saltty qurmetteýge mindettisiń dep. Mine, ózara syılastyq osyndaı ıgi dástúrlerdiń qalyptasýyna ózindik jol salady. Qazaq mádenıe­ti men tili jalpymyzdyń dińgegimiz bolsa, sony bilý arqyly biz ózimiz­diń de tól mádenıetimiz ben tili­mizdi tanı bastaımyz. Eldi, jerdi súıý halqymyzdyń ortaq ıgiligin saqtaı bilý basty maqsatymyz bolýǵa tıis. Egor KAPPEL, QHA-dan saılanǵan Májilis depýtaty.