Eýropalyq Odaq belgili bir jaǵdaılarda «Talıbanmen» kelissóz júrgizýge daıyn. Bul týraly eýropalyq dıplomatııanyń basshysy Hosep Borrell Eýroparlamentte málimdedi. Ol Aýǵanstanǵa kómek kórsetý qajettigin aıtty, dep jazady Egemen.kz.
«Azyq-túlik baǵasy ósýde. Qarjy júıesi quldyraýda. Eýropalyq komıssııa bizdiń kómegimizdi tórt ese - 50-den 200 mıllıon eýroǵa deıin kóbeıtýge sheshim qabyldady. Biraq bul tipti teńizge tamǵan tamshy ǵana. Oqıǵalarǵa áser etý múmkindigine ıe bolý úshin Talıbanmen qarym-qatynas jasaýǵa májbúrmiz. Basqa tańdaý joq. Bul olardy moıyndaǵanymyzdy bildirmeıdi, múlde olaı emes. Bul, múmkindiginshe kelissóz, talqylaý, kelisim júrgizý ǵana», dedi ol.
Buǵan deıin BUU ókilderi Aýǵanstanda azyq-túlik pen basqa da qajetti zattardyń taýsylyp bara jatqanyn aıtqan bolatyn. Olar halyqaralyq qaýymdastyqtan asharshylyqtyń aldyn alý úshin elge gýmanıtarlyq kómek jiberýdi surady.