Reseı tarapynyń usynysymen 2018 jylǵy qyrkúıekte Dýshanbede bolǵan Táýelsiz Memleketter Dostastyǵy Memleket basshylarynyń kezekti sammıtinde Olımpıada jyldarynda TMD elderiniń 14 pen 23 jas aralyǵyndaǵy sportshylarynyń Oıyndaryn ótkizý týraly sheshim qabyldaǵan bolatyn. Jýyrda sporttyń 16 túrinen bolǵan alǵashqy osy oıyndar Tatarstan astanasy Qazan qalasynda aıaqtaldy.
Oıyn túrleriniń qataryna dzıýdo, sambo, boks, taı boksy, semserlesý, karate, gır sporty, armrestlıng, kúres jáne t.b. boldy. Oǵan Qazaqstannan basqa Ázerbaıjan, Armenııa, Belarýs, Qyrǵyzstan, Moldova jáne Reseıden 1,5 myńdaı sportshy qatysty.
Qazaqstan quramasyn 200-ge jýyq sportshy quraǵan edi. Sonyń ishinde soltústikqazaqstandyq 5 boksshy boldy. Qyzyljarlyq órender namysty qoldan bermeı Qazaqstan qorjynyna 1 altyn, 3 kúmis saldy. Altyn júldeniń ıegeri, taı boksynyń sheberi Shámil Ermaǵanbetov aldymen reseılik, sosyn belarýstyq qarsylastaryn qapy qaldyryp, jeńis tuǵyryna kóterildi.
«Soltústikqazaqstandyq sportshylar halyqaralyq oıyndarǵa Petropavldaǵy jáne Shýche qalasyndaǵy sporttyq aımaqtarda eki kezeńmen uzaq daıyndalǵan edi. Nátıjesinde bes sportshynyń tórteýi jaqsy nátıjeler kórsetti. Eger fınalda Shámilden basqa sportshylarymyz da jaqsy óner kórsetkende qorjynymyz tolymdyraq bolar edi... Biraq sonyń ózinde bizdiń úlesimiz jaqsy dep sanaımyz», deıdi taı boksynyń jattyqtyrýshysy Ivan Van-Hon-Týn.
Shámildiń ózi qarsylastarynyń osal bolmaǵanyn, ekeýi de halyqaralyq dárejedegi sport sheberleri ekenin aıta kelip, qapysyz daıyndyqtyń arqasynda ǵana olardy jeńe alǵanyn jetkizdi.
Jalpykomandalyq esepte qazaqstandyqtar 18 altyn, 35 kúmis jáne 53 qola medalmen úshinshi oryn aldy.