Almatyda qala kúnine jáne Táýelsizdiktiń 30 jyldyǵyna oraı jasóspirimder arasynda tuńǵysh ret «Qobyz saryny» respýblıkalyq baıqaýy ótti.
Qońyr úndi áldılegen úkili úmitkerler baba murasyn jańǵyrtyp, ózara baq synady. Saıystyń gala konserti «Alataý» dástúrli óner teatrynda shymyldyǵyn túrip, jeńimpazdar men júldegerler el aldynda marapattaldy. Baıqaý qorytyndysy boıynsha bas júlde 13 jastaǵy Baıan Janahmetovaǵa buıyrdy. О́z oıymen bólisken jas ónerpaz, baı tembrli aspapty joǵary deńgeıde meńgerip, qobyzdyń tasasyndaǵy tylsym syrdyń tereńine boılaǵysy keletinin jetkizdi.
«Ulttyq mádenıetimizdiń jaýharyna balanatyn qobyz aspaby ǵasyrdy ǵasyrǵa jalǵap, sazdy sarynyn úzbeı, halqymyzdyń qýanyshy men muńyn jetkizip keledi. Is-sharanyń basty maqsaty – ulttyq ónerimizdi nasıhattaý, ǵasyrlar qoınaýynan syr shertetin dala únin jastarǵa tálimdik taǵylymy mol dúnıe retinde dáripteý», deıdi Almaty qalalyq Mádenıet basqarmasy basshysynyń orynbasary Danııar Álıev.
Baıqaýǵa qazylyq etken prıma-qobyzshy Ǵazıza Ǵabrahımova sońǵy jyldary jas talanttar shoǵyry kóbeıgenin jáne ulttyq oryndaýshylardyń deńgeıi ósip kele jatqanyn aıtady. Oǵan dálel baıqaýda óner kórsetýge elimizdiń túkpir-túkpirinen júzdegen jas qobyzshy nıet bildirgen. Kóneniń kózindeı bolǵan aspapty dáripteý rýhanı jańǵyrýdyń ózegi ekenin alǵa tartqan uıymdastyrýshylar is-sharany dástúrli túrde ótkizip turýǵa yntaly ekenderin bildirdi.
ALMATY