Senattyń Qarjy jáne bıýdjet komıtetiniń depýtattary Almaty oblysynda kóshpeli otyrys ótkizip, aqparattyq júıe arqyly memlekettik qyzmetter kórsetýge, keden isi salasyndaǵy elektrondyq súıemeldeýge jáne ony ákimshilendirýdi jetildirýge qatysty máselelerdi talqylady, dep habarlaıdy Egemen.kz.
Senat komıtetiniń tóraǵasy Olga Perepechına kedendik jáne salyqtyq ákimshilendirýdi jetildirý máselesi otandyq kásipkerlikti damytý úshin mańyzdy ekenin atap ótti.
«Respýblıkalyq bıýdjet pen onyń atqarylýy týraly esepterdi qaraý kezinde syrtqy ekonomıkalyq qyzmet, kedendik ákimshilendirýdi jetildirý, sondaı-aq salyqtyq ákimshilendirý mańyzdy ári ótkir máselelerdiń biri bolyp tabylady», dedi Olga Perepechına otyrys barysynda.
Qarjy mınıstriniń orynbasary Marat Sultanǵazıev kóshpeli otyrysqa qatysýshylarǵa kedendik elektrondyq deklarasııalaý týraly aıtty. Ol pandemııa kezinde keden qyzmetterin qashyqtan usyný 100% júzege asqanyn aıtty. Degenmen, mınıstrdiń orynbasary kedendik ákimshilendirýdi tolyq jetildirý úshin barlyq prosesterdi keń aýqymda odan ári sıfrlandyrý qajet dep sanaıdy.
Senator Olga Perepechına otyrysty qorytyndylaı kelip, usynylǵan materıaldardy taldaý negizinde Komıtet ýákiletti memlekettik organdarǵa jiberiletin qosymsha usynymdar ázirleıtinin habarlady.