Elimizdiń medıa salasyndaǵy basty sharadardyń biri «Astana Media Week-2021» ekinshi kúniniń aıasynda sarapshylar qaýymdastyǵy qoǵam men BAQ-tyń jańa, kovıdten keıingi álemdegi róli jaıly áńgimelep, Qazaqstandaǵy jarnamalyq medıa naryǵynyń perspektıvalaryn taldady, dep jazady Egemen.kz.
Sharanyń ekinshi kúni «QR Táýelsizdik kezeńinde BAQ-tyń qalyptasýy» taqyrybyndaǵy dóńgelek ústelden bastaldy. Qatysýshylar qazaqstandyq televızııanyń damýy, Jýrnalıster odaǵynyń qurylýy jáne kadrlardy daıarlaý máseleleri týraly pikir almasty.
Keıin «Qoǵam jáne BAQ jańa, kovıdten keıingi álemde» atty paneldik dıskýssııa ótti. Oǵan Qazaqstan, Shveısarııa, Avstrııa elderiniń sarapshylary qatysty. Paneldik dıskýssııa qatysýshylary qoǵamdaǵy ózgerister jáne onyń qazirgi zamanǵy BAQ-qa qoıatyn talaby týraly oı bólisti.
«QR jarnamalyq medıa naryǵy: aǵymdaǵy jaǵdaı, damý perspektıvalary, problemalar men sheshimder» taqyrybyndaǵy dóńgelek ústeli aıasynda Orta Azııa jarnama qaýymdastyǵynyń sarapshylary men iri TV-seılz-haýs ókilderi jarnamalyq medıa naryǵyndaǵy qazirgi jaǵdaımen bólisti.
Qatysýshylar ındýstrııanyń turaqty damýyn qamtamasyz etý úshin qazirgi jaǵdaılardy eskere otyryp, zańnamaǵa ózgeris engizý jóninde talqy jasady. Sondaı-aq barlyq másele boıynsha memlekettik organdar men OAJQ arasyndaǵy áreketterdiń alǵashqy qadamdary jaıly kelisti.
«AMW» barysynda tuńǵysh ret «Fremantle» televızııalyq kontentiniń eýropalyq dıstrıbıýtory, «Sony Pictures» fılmderi men televızııalyq baǵdarlamalarynyń óndirýshisi jáne dıstrıbıýtory, «Nbc /Universal» amerıkandyq mass-medıa kompanııasy, «Kiss Media» televızııalyq ónimder men medıa kompanııanyń dıstrıbıýtory «Global Agency» ókilderi úzdik ónimderiniń tusaýkeserin jasap, Formats Day ótkizdi. Shara qatysýshylary óndirýshilerdiń seriktesi bolý múmkindigin aldy.
Astana Media Week-2021 aıasynda «Biz birgemiz!» atty áleýmettik beınerolık ssenarııleriniń tusaýkeseri ótti. Sharany «Habar» Agenttigi» AQ uıymdastyrdy. Jobaǵa onnan astam qazaqstandyq prodıýser men ssenarıst qatysty. Barlyǵy 20 ssenarıı usynylǵan, biraq tek 9 qatysýshy irikteý kezeńinen ótip, ıdeıasyn usyndy. Nátıjesinde Aınur Asylbekqyzy «Otbasylyq qundylyqtar» atty kategorııasynda júldeger atandy. Lımara Bekturǵanova «Ekologııa» kategorııasynda eń úzdik ssenarıst atandy. «Qarjylyq saýattylyq» taqyryby boıynsha jeńimpaz retinde Súleımen Nurdáýlet tanyldy. Atalǵan ssenarııler boıynsha daıyn beınerolıkterdi «Habar» jáne «Habar 24» telearnalary kórsetedi.
«Qazaqstan» RTRK uıymdastyrǵan pıtchıng barysynda bolashaq serıaldardyń ssenarııi talqylandy. Munda otandyq prodakshn-stýdııa ókilderi 2022 jylǵa arnalǵan jańa serıaldar úshin ıdeıa men usynys bildirdi. Astana Media Week-2021 aıasynda ótip jatqan baıqaýǵa 21 kompanııa ótinim bergen. Televızııalyq jumystar Qazaqstannyń tarıhı qaıratkerlerine, ata-babalarymyzdyń tarıhı murasyn, aýyl ómirin nasıhattaýǵa, rýhanı astanasy - Túrkistanǵa, tarıhı Otanyna oralǵan qandastarǵa, qutqarýshylarǵa, sportty, halyq kásipshiligin, ulttyq jáne otbasylyq qundylyqtardy nasıhattaýǵa arnalýy tıis. Korporasııa jarııalaǵan baıqaý 30 qyrkúıekke deıin jalǵasady.
QR AQDM baspasóz qyzmetiniń jazýynsha, aptalyqtyń ekinshi kúni 6425 ret onlaın qaralǵan. Eń úlken aýdıtorııa 25-34 jas shamasyndaǵylar bolǵan.
«Qoǵam jáne BAQ jańa, kovıdten keıingi álemde» atty paneldik dıskýssııa osy kúnniń eń zor suranysyna ıe boldy. Oǵan 1574 adam qosyldy. Sosyn eń kóp qaralǵan shara «QR jarnamalyq medıa naryǵy: aǵymdaǵy jaǵdaı, damý perspektıvalary, problemalar men sheshimder» dóńgelek ústeli boldy. Sarapshylar pikirtalasyna 1248 kórermen qosyldy. Sondaı-aq «Qazaq radıosy. Efırde 100 jyl» sheberlik saǵatynyń aýdıtorııasy da 1136 kórermenge deıin jetti», dep jazylǵan habarlamada.