UQK Shekara qyzmeti akademııasynyń kınologııa jáne at daıyndyǵy kafedrasynyń ákimshilik korpýsy arnaıy baǵdarlama aıasynda (EXBS) kúrdeli jóndeýden ótkizilip, saltanatty jaǵdaıda shekarashylarǵa tapsyryldy, dep habarlady QR UQK ShQ baspasóz qyzmeti.
Qurylys jumystary AQSh-tyń Qazaqstandaǵy elshiliginiń «Eksporttyq baqylaý jáne shekaranyń qaýipsizdigi» baǵdarlamasy negizinde júrgizildi, barlyq talaptarǵa jaýap beredi.
Ǵımarattyń ashylý saltanatyna joǵaryda atalǵan baǵdarlamanyń keńesshisi Kırk Bredham, «Artek Konstrakshn» JShS qurylys kompanııasynyń dırektory Emrah Seıhýn, menedjeri Erhan Aqsý jáne qurylys jumystarynyń bastyǵy Serik Qarbaev qatysty.
Osy oraıda atalǵan kompanııanyń bizdiń elimizde jumys istep kele jatqanyna bir jyl ǵana bolǵandyǵyn, degenmen, buǵan deıin olar Aýǵanstan, Túrkııa jáne AQSh sekildi elderde áskerı nysandar salyp, ózderin jaqsy jaǵynan kórsetkenderin atap ótý kerek.
Kafedra qurylǵan kezde, ıaǵnı alǵashqy jyldary onyń oqý korpýstary ofıserlik-oqytýshylyq quramnyń kúshimen soǵyldy. Árıne, ol kezdiń jaǵdaıy da basqa bolatyn. Búgingi tańda munda jumys isteýge qajetti barlyq jaǵdaı jasalǵan. Jóndeý jumystarynyń barlyǵy eýropalyq talaptarǵa saı keledi. О́tken jyldyń tamyz aıynda bastalǵan jóndeý jumystary tolyq aıaqtalyp, mine, shekara saqshylaryna arnalǵan alǵashqy oqý sabaqtary da júrgizilgeli otyr.
– «Eksporttyq baqylaý jáne shekaranyń qaýipsizdigi» baǵdarlamasy (EXBS) 2000 jyldan bastap jumys istep keledi, eń bastysy jumystyń sapalylyǵyna biz kepildik beremiz, – deıdi baǵdarlamanyń keńesshisi Kırk Bredham.
Akademııa bastyǵynyń oqý isteri jónindegi orynbasary, polkovnık Pavel Polıvanov pen kafedra meńgerýshisi Erkin Ońbaev sóz kezeginde qonaqtarǵa alǵystaryn aıtyp, aldaǵy ýaqytta da birlese jumys isteı beretindikterine senimderin bildirdi.