Sıfrlyq damý, ınnovasııalar jáne aeroǵarysh ónerkásibi vıse-mınıstri Ashat Orazbek Qazaqstan +7 telefon kodyn paıdalana berýi múmkin degen túsinikteme berdi, dep habarlaıdy Egemen.kz.
Buǵan deıin Ashat Orazbek buqaralyq aqparat quraldaryna bergen suhbatynda jańa telefon kodyna kóshý boıynsha reseılik tarappen kelissózder júrgizilip jatqanyn, nátıjesinde Qazaqstan +7 kodyn paıdalana berýi múmkin ekenin aıtqan bolatyn. Onyń aıtýynsha, telefon kodyn ózgertýge ótinish berý Reseımen aradaǵy kelissóz erekshelikterine baılanysty, reseılik tarap alty aı ishinde kelisimdi bir jaqty buza alady.
Mınıstrliktiń baspasóz qyzmeti bul aqparatty rastap, yqtımal nusqalar ázirlenip jatqanyn, bul nusqanyń teorııalyq turǵydan ábden múmkin ekenin aıtty.Telefon nómiri +997-ge ózgertýge bıýdjetten bólinetin shyǵyn týraly Ashat Orazbek bundaı tehnıkalyq sharaǵa memlekettik bıýdjetten qarajat bólinbeıtinin aıtty.
«+997-ge kóshýge baılanysty telekommýnıkasııa jelilerinde jabdyqty qaıta ornatý jáne qaıta konfıgýrasııalaý jumystary baılanys operatorlarynyń menshikti qarajaty esebinen júrgiziledi. Qazir prosesterdi avtomattandyrýdyń tehnologııalyq deńgeıi, onyń múmkindikteri qazaqstandyq baılanys operatorlarynyń jabdyqtary jańa kodqa qıyndyqsyz aýysýǵa múmkindik beredi», dedi vıse-mınıstr bergen jaýabynda.
Mınıstrlik telefon kodyn ózgertý kezinde memlekettik jáne jeke qurylymdardyń shyǵyndary, telefon nómirine baılanysty tólem qyzmetteriniń jumysyndaǵy qıyndyqtar týraly túsindirdi.
«Halyqaralyq telekommýnıkasııa odaǵynyń usynystaryna sáıkes (E.164.1) engizilgen sátten bastap jańa jáne eski kodtar eki jyl birge qoldanylýy múmkin. Bul týraly úkimettik jáne kommersııalyq qurylymdar aldyn ala habardar bolady. Osy ýaqyt ishinde ártúrli sıfrlyq qyzmetterdiń ıeleri jańa kodqa kóshýge baılanysty ózgeristerdi óz qarajaty esebinen jasaıtyn múmkindik ıe bolady», dedi Ashat Orazbek.
Eske salaıyq, buǵan deıin halyqaralyq kod Qazaqstanda +7-den +997-ge deıin ózgerýi múmkin ekeni aıtyldy. Bul týraly buryn Sıfrlyq damý, ınnovasııa jáne aeroǵarysh ónerkásibi mınıstri Baǵdat Mýsın málimdedi. Mınıstrdiń aıtýynsha, operator kodtary ózgermeıdi.