Atyraý oblysynda Kaspıı jaǵalaýyndaǵy qamys órti tolyq sóngen joq. Jalyndy sóndirýge tikushaqpen 63 tonna sý tógildi, dep jazady Egemen.kz.
Oblystyq tótenshe jaǵdaılar departamentiniń baspasóz qyzmetinen málim etkendeı, 11 qazanda jergilikti ýaqytpen saǵat 12:00-ge deıin teńiz jaǵalaýynyń 550 gektar aýmaǵynda qamys órtengen. Qazir eki frontaldy janý oshaǵy anyqtalyp otyr.
«Onyń biri Isataı men Qurmanǵazy aýdanynyń shekarasyndaǵy Maqash aýyldyq okrýginiń, al, ekinshisi Teńiz aýyldyq okrýginiń aýmaǵynda ornalasqan. О́rtengen aýmaq 550 gektardy quraıdy. Búginge deıin 420 gektar aýmaqtyń órti sóndirildi. Onyń ishinde sý aǵyzý qurylǵysynyń kómegimen 35 gektarda, jeke quramnyń kúshimen 197 gektarda janǵan jalyn joıyldy. Al, 188 gektardyń órti ózdiginen sóndi» dep habarlady departamenttiń baspasóz qyzmeti.
Teńiz jaǵalaýynda tutanǵan jalyndy sóndirý úshin «Qazavıaqutqarý» AQ tikushaǵynyń sý shashý qurylǵysymen 21 ret sý tógilgen. Jalyndy sóndirý úshin tógilgen sýdyń mólsheri 63 tonna.
Dál qazir qamys órtin sóndirý úshin Atyraý oblystyq tótenshe jaǵdaılar departamentiniń jeke quramynan 34 adam, 5 tehnıka, 4 motosorǵysh, 1 generator, 40 jeń, 1 úrlemeli shatyr, O.Kóshekov atyndaǵy Atyraý agrarlyq-tehnıkalyq kolledjinen 1 adam, 1 John Deere-6135b traktory, sondaı-aq, «Qazavıaqutqarý» AQ-nyń 5 qyzmetkeri men «MI-871» tikushaǵy tartylǵan.