16-17 qazanda Nur-Sultanda «Han Shatyr» saýda oıyn-saýyq ortalyǵynyń janynda Qostanaı oblysynyń aýyl sharýashylyǵy kásiporyndarynyń qatysýymen aýyl sharýashylyǵy jármeńkesi ótedi, dep habarlaıdy Egemen.kz elorda ákimdiginiń resmı saıtyna silteme jasap.
Eki kún ishinde elordada oblystyń 14 aýdany men 3 qalasynan 50-den astam kásiporyn óz ónimderin satady. Onyń ishinde: Altynsarın, Áýlıekól, Denısov, Jitiqara, Qarabalyq, Qarasý, Qamysty, Qostanaı, Meńdiqara, Naýryzym, Sarykól, Taran, Fedorov, Uzynkól aýdandary jáne Arqalyq, Rýdnyı, Qostanaı qalalary.
Oblys kásiporyndary 270 tonna kóleminde 100-den astam ónim túrlerin: 50 tonna et, 31 tonna sút ónimderi, 20 tonna shujyq ónimderi men jartylaı fabrıkattar, 27 tonna jarma men makaron ónimderi, 60 tonna kartop pen kókónis, 20 tonna un ónimderin satylymǵa shyǵarady.
Sondaı-aq satylatyn ónimderdiń assortımentine nan-toqash, kondıterlik ónimder, bal jáne basqalar kiredi.
Jármeńkede «Mılh» JShS, «DEP» JShS, «Lıder-2010» JShS, «Baıan Sulý» AQ, «Terra» ShQ, «Prombaza 7» JShS, «Torǵaı Et» JShS jáne t.b. brendteri respýblıka boıynsha jáne odan tys jerlerde tanymal sút jáne et kásiporyndary usynylatyn bolady.
Esterińizge sala keteıik, baǵalar dástúrli túrde naryqtyq baǵadan 10-15%-ǵa tómen bolady. Jármeńke Nur-Sultan qalasynyń taýarlar men kórsetiletin qyzmetterdiń sapasy men qaýipsizdigin baqylaý departamenti usynǵan sanıtarlyq normalardy saqtaı otyryp ótkiziletin bolady.
Aıta ketý kerek, bıyl elordada áleýmettik mańyzy bar azyq-túlik ónimderiniń baǵasyn turaqtandyrý maqsatynda kókónister men jemisterdiń pisý merzimin eskere otyryp, 14 jármeńke ótkizý josparlanǵan. Aýyl sharýashylyǵy óńirlik jármeńkeleriniń maýsymy Nur-Sultanda 31 qazanǵa deıin jalǵasady.
21 tamyzdan bastap elordadaǵy jármeńkelerde Túrkistan, Batys Qazaqstan, Shyǵys Qazaqstan, Qyzylorda, Almaty, Atyraý, Jambyl, Aqtóbe, Qaraǵandy, Pavlodar jáne Mańǵystaý oblystarynyń aýylsharýashylyq taýar óndirýshileri óz ónimderin usyndy.