Sochıde Qazaqstannan qonys aýdarǵandar da kezdesedi. Qaraǵandydan kelgen er adammen kóshede kezdesip qaldyq. Aıaldamada avtobýs kútip otyrǵanymyzda janymyzǵa kelip, qazaqsha amandasty.
Qasymyzǵa kelgen bette: «Halderiń qalaı, qazaqtar? Amansyńdar ma?», dep ana tilimizde jón surasty. О́zi Reseıge 15 jyl buryn kóship kelgen eken. Qaraǵandyda turypty. Qazir Sochıde turady. Az-kem áńgimeleskenimizde bizdi alystan kórip, syrt kıimimizdegi «Kazakhstan» degen jazýdy kórgen soń, arnaıy qasymyzǵa kelgenin aıtty. Sochı týraly suraǵanymyzda, bul jerde basqa qalalardan góri halyqtyń turmys jaǵdaıy jaqsy ekenin jetkizdi. Degenmen, Qazaqstanda týyp-ósken soń, bizdiń eldi saǵynatynyn da jasyrmady. О́zi kóp sózge joq adam eken. Osylaı onymen jón surasyp, qoshtastyq.
Ekinshi adammen de kóshede kezdestik. Kósheni jaıaý aralaýǵa shyǵyp, dem alyp otyrǵanymyzda janymyzǵa jasy 40-tan asqan kelinshek kelip, amandasty. Birden: «Sálem berdik!», dedi. Qasymyzda blogger, munara.kz saıtynyń bas redaktory Arshat Orazov bar edi. Sol jigit odan: «Aqtóbedensiz be?», dep surady. Ol bolsa Aqtóbede turǵanyn aıtty. Arshat: «Báse, bizdiń jaqta adamdarmen osylaı amandasady», dep qoıady.
Ol ózin Iýlııa dep tanystyrdy. Bizdi alystan kórgende sońymyzdan júrip, amandasqysy kelgenin jetkizdi. Buǵan deıin de qazaqstandyqtardy kóripti. Biraq olardyń janyna kele bergende avtobýsqa otyryp ketkenderin aıtty. Osy kezde Iýlııanyń kúıeýi de qasymyzǵa kelip, amandasty. Ol da buryn Qazaqstanda turǵan eken. Naqtyraq aıtsaq, Túrkistanda týypty. Osylaı, bir kúnde burynǵy eki otandasymyzben kezdestik.
Kelesi kúni avtobýsta taǵy bir Qazaqstanda turǵan adammen kezdesip qaldyq. Avtobýsta zeınetke shyqqan áıel adam bizdi kórip, rıza bolyp otyrǵanyn jasyrmady. Osy kezde qasymyzǵa taǵy bir áıel adam kele bergende, bizben júrgen áriptesimizdiń bireýi óz ornyn bergende ekeýi tipten rıza boldy. Jalpy, bul elde avtobýsta úlken kisige oryn berý degendi kóp bile bermeıdi eken. Oryn bermeý qalypty jaǵdaı sııaqty. Máselen, avtobýsta, elektrıchkada bolsyn jastar áıel adam, jasy úlken adam túregep tursa da otyra beredi. Oǵan turǵan adamdar eshteńe deı almaıdy. Osydan keıin bıatlon jarysyna bara jatqanymyzda qasymyzǵa tártip saqshysy kelip, buryn Qazaqstanda turǵanyn aıtty. Ol Stepnogorskide turypty. Qazir onda atam qaldy, ózim Ýdmýrtııada turamyn, dedi. Sodan keıin bıatlon jarysyna baryp, vokzaldan shyǵa bergende taǵy bir kóshede kólikterdiń júrisin rettep turǵan jol saqshysymen kezdestik. Ol Qaraǵandyda turǵan eken. Sochıge kóship kelgenine 15 jyldaı ýaqyt bolypty.
Al keshe Olımpııalyq parkke bara jatyp, elektrıchkada kezdesken adamymyz Astanada turypty. Reseıge eki jyl buryn kóship kelipti. Ol da bizge elektrıchkada qazaqtardy kórip, kóńili kóterilip qalǵanyn aıtty. Jalpy, Sochıge qonys aýdarǵan adamdardyń báriniń Qazaqstanǵa degen sezimi jaqsy ekeni kórinip turdy. Bizdi kóshede kórgende: «Bizdiń qazaqtar. Bizdiń Otanymyz», deıdi. Onysyn janynda jergilikti turǵyndar tursa da jasyrmaıdy. Bizge de olardyń osy sózderi unady.
Dastan KENJALIN,
«Egemen Qazaqstan» –
Sochıden.