Birinshi jartylaı orta salmaq dárejesindegi kásipqoı boksshy Batyr Júkembaev kanadalyq «Eye of The Tiger Management» promoýterlik uıymynan ketkenin rastady, dep habarlaıdy Egemen.kz.
Bul týraly otandasymyz óziniń Instagram áleýmettik jelisindegi paraqshasynda jazdy.
«Men «Eye of The Tiger Management» promoýterlik uıymynyń jetekshisi Kamıl Estefanǵa kásibı mansabymdy bastaýyna múmkindik bergeni úshin alǵysymdy aıtamyn. Kásibı mansabymdy órkendetý úshin eki tarap oılasa kele eki túrli jolmen júrý jaıly sheshim qabyldadyq.
Maǵan sengen barlyq jankúıerlerge shyn júrekten rızashylyǵymdy bildiremin. Sizderdiń qoldaýlaryńyzdyń arqasynda álem chempıony atanamyn degen armanym maqsatqa aınaldy. Qazir Las-Vegasta oqý-jattyǵý jıynyn ótkizip jatyrmyn. Jaqyn kúnderi kezekti jekpe-jegim jaıly habarmen bólisetin bolamyn», dedi Batyr.