Keshe elimizdiń Bas prokýratýrasy qaısybir bankterdiń bankrot aldyndaǵy jaǵdaıy týraly jalǵan aqparattyń eshbir negizi bolmaǵandyǵy jáne bolýy múmkin emestigi týraly málimdeme jasady.
Sońǵy kúnderi ártúrli kommýnıkasııa quraldary arqyly (áleýmettik jelilerdi qosa alǵanda ınternet-habarlamalar, SMS) «Sentr Kredıt» banki, «Kaspı Banki» jáne «Alıans bankiniń» bankrot bolý múmkindigi týraly aqparat tarala bastaǵany málim boldy.
Osy habarlamalar atalǵan bankilerdiń salymshylaryn dúrliktirip, olardy banktik shottardaǵy qarajattaryn jappaı alýǵa ıtermeleýde. Nátıjesinde, bul áreketter júıe quraýshy bankterge aıtarlyqtaı zııanyn tıgizdi, qoǵamdaǵy áleýmettik shıelenistiń ósýine ákelip soqty, sondaı-aq eldegi qarjy ınstıtýttaryna degen turǵyndardyń senimine nuqsan keltirdi.
Atalǵan bankterdiń bankrot aldyndaǵy jaǵdaıy týraly jalǵan aqparattyń eshbir negizi bolmaǵandyǵy jáne bolýy múmkin emestigi anyqtaldy. Sáıkesinshe, taratylyp jatqan málimetter kórineý jalǵan bolǵan jáne banktik saladaǵy ahýaldy turaqsyzdandyrýǵa baǵyttalǵan.
Qazirgi ýaqytta quqyq qorǵaý organdary tıisti aryzdardyń negizinde bankterdiń qarjylyq ahýaly jónindegi jalǵan aqparatqa qatysy bar barlyq tulǵalardy anyqtaý jónindegi jedel-izdestirý sharalaryn keshendi túrde júrgizýde.
Birqatar tulǵalar anyqtaldy jáne olarǵa qatysty qajetti tekserý sharalary júrgizilýde. Talap aryzdar berildi.
Qazir qylmystyq is qozǵaý jónindegi másele sheshilýde.
Bas Prokýratýra jalǵan habarlamalardy taratýǵa kináli tulǵalardyń barlyǵy qylmystyq qýdalanýmen qosa, materıaldyq jáne zańmen belgilengen ózge de jaýapkershilikterge tartylatyndyǵyn jaýapkershilikpen málimdeıdi. BAQ ókilderinen qaralyp jatqan oqıǵalardy jarııa etý kezinde tek tekserilgen faktilerge súıenýge jáne shyndyqqa sáıkes kelmeıtin aqparattyń jarııalanýyna jol bermeýdi suraımyz, deıdi Qazaqstan Respýblıkasynyń Bas Prokýratýrasy.