Qazaqstan Respýblıkasy Ulttyq bankiniń tóraǵasy Qaırat Kelimbetov atalmysh banktiń Almaty qalasyndaǵy bas ǵımaratynda buqaralyq aqparat quraldarynyń ókilderimen kezdesti.
Sońǵy az ǵana ýaqyt ishinde jýrnalıster qaýymymen tórtinshi márte júzdesip otyrǵandyǵyn jáne bul jaǵdaı eldegi qarjy máselesin kúrdelendirgisi keletin múddeliliktiń saldarynan ekenin jetkizgen bas bankır qazaq qoǵamynda otandyq bankterge qatysty bolyp jatqan oqıǵalarǵa túsinik berdi.
«Keshe Astana qalasynda Qazaqstan Respýblıkasy Prezıdentiniń janyndaǵy Ortalyq kommýnıkasııalar qyzmeti ǵımaratynda BAQ ókilderine shuǵyl málimdeme jasaýǵa májbúr boldyq. Sebebi, 18 aqpan kúni birqatar ǵalamtor paraqshalary men otandastarymyzdyń jeke qalta telefondaryna «Qazaqstandyq birneshe banktiń bankrottyq jarııalaý týraly sheshim qabyldaǵany» jóninde aqparattar taratylǵan.
Osy oqıǵaǵa baılanysty Qazaqstan Respýblıkasynyń Ulttyq Banki atalmysh maǵlumattyń negizsiz ekendigin jáne bul elimizdegi banktik júıeni shaıqaltýǵa baǵyttalǵan áreket ekendigin málimdeıdi» - dedi Qaırat Nematuly.
Esterińizge sala ketsek, 18 aqpan kúni áýeli ǵalamtor betterinde, sosyn jeke adamdardyń uıaly telefondarynda paıda bolǵan «shuǵyl aqparat» kóptegen salymshylar men qolda bar aqshasyn shetel valıýtasyna aýystyrǵysy keletin azamattardyń arasynda ájeptáýir dúrbeleń týǵyzdy. Elimizdiń iri qalalary men oblys ortalyqtarynda ornalasqan bank ǵımarattary kelýshige lyq tolyp, valıýta aıyrbastaý beketteri bir kúndik qarjy operasııasyn birer saǵattyń ishinde atqaryp tastady. Nátıjesinde, QR Ulttyq Bank Tóraǵasy el aldyna shyǵyp bul dúrbeleńniń qoldan jasalǵan arandatý nıeti ekendigin, uıymdastyrýshylarmen quqyq qorǵaý qyzmeti aınalysatyndyǵyn aıtqan.
«Bizdiń qazaqstandyq bankterdiń barlyǵynda ulttyq jáne sheteldik valıýta qory jetkilikti. Qandaı jaǵdaı bolmasyn, Ulttyq Bank eldegi ózge bankterdiń barlyǵyna qol ushyn berýge múddeli ári daıyn, - deı kelip Qaırat Kelimbetov arandatý áreketin uıymdastyrǵan kisilerdi tabý jáne zań talabyna saı shara qoldaný úshin QR Bas prokýratýrasyna ótinish túsirgendikterin, otandyq salymshylardyń jekelegen bankterde saqtaǵan qarajaty ulttyq jáne sheteldik valıýta túrinde de zańǵa sáıkes qamsyzdandyrylatynyna Memleket kepil ekendigin, sondaı-aq BAQ qyzmeti eldegi turaqtylyqty saqtaý maqsatynda alypqashpa negizsiz aqparattardy anyqtap baryp halyqqa taratýyn surandy.
Baspasóz máslıhatynan keıin Bas bankır jýrnalısterdiń qoıǵan birqatar suraqtaryna jaýap berdi.
Qanat ESKENDIR,
«Egemen Qazaqstan».
ALMATY.