Almatyda kópqabatty úıdiń lıftisinde oıran salǵan er adam ustaldy. Bul týraly qalalyq polısııa departamenti basshysynyń orynbasary Rústem Ábdirahmanov málimdedi, dep habarlaıdy Egemen.kz.
Oqıǵa 1 qarashada bolǵan. Vıdeoda er adam bir kelinshekpen birge lıftige kiredi. Lıft batyrmasyn basady da, esiktiń jabylyp jatqanyna qaramaı, paneldi urǵylaıdy. Sosyn bir teýip syndyrady. Janynda turǵan áıel ony alyp shyǵýǵa tyrysqan. Biraq ol qaıtyp kelip, paneldi taǵy tebedi.
«Biz buzaqynyń kim ekenin anyqtadyq. Ol 1978 jyly týǵan Júnisov T.J. bolyp shyqty. Ol Ákimshilik quqyq buzýshylyq týraly kodekstiń 434-baby boıynsha jaýapqa tartyldy», dep jazdy Ábdirahmanov.
Buzaqy qala turǵyndarynan vıdeo arqyly keshirim surady.
Osy oraıda polısııa basshysy buzaqy keshirim surasa da, jaýapkershilikten bosatylmaıtynyn atap ótti. Al 434 bap (Usaq buzaqylyq) boıynsha 5 AEK (14 585 teńge) kóleminde aıyppul salý ne 10 táýlikke deıingi merzimge ákimshilik qamaýǵa alý jazasy qarastyrylǵan.