Qoǵam yqtımal lańkestik shabýyldardan laıyqty qorǵalýǵa tıis

Kazakhstan Security Systems – qaýip­sizdik salasyndaǵy zamanaýı ázir­lemelerdi, tehnologııalardy usynatyn, qaýip­sizdik quraldarynyń mamandary men tutynýshylarynyń, qoǵamdastyq pen memlekettik bılik ókilderiniń keń aýdıtorııasyn biriktiretin iskerlik alańy.

Is-shara barysynda Terrorızmge qar­sy ortalyq shtabtyń bólim basshysy Janarbek Jańabaev 2018-2020 jyl­dary el kóleminde terrorızmdi qarjy­lan­dyrýǵa qatysty 26 fakti tirkelip, joly kesilgenin málimdedi. «Biz Qarjylyq monıtorıng agenttigimen terrorıstik áre­ketterdi qarjylandyrýǵa qarsy kúresti birlesip júrgizip jatyrmyz. Elimizde dinı destrýktıvti aǵymdardy qarjylandyrý máselesi basty nazarda. UQK, IIM, Bas prokýratýra, Qarjylyq monıtorıng agenttigi jáne Qarjy mınıstrligi Kirister komıtetiniń bul jónsizdikke qar­sy birlesip kúresý mehanızmi ázirlendi. Sta­tıs­tıkaǵa súıensek, 2018-2020 jyl­dary el kóleminde terrorızmdi qarjy­lan­dyrýǵa qatysty 26 fakti tirkelip, joly kesildi. Atalǵan faktiler boıyn­sha qylmystyq is qozǵaldy. Bul oraıda Aqparat jáne qoǵamdyq damý mınıstr­ligi de halyq arasynda túsindirý jumystaryn uıymdastyrdy. Bıyldyń ózin­de ekstremıstik qylmysqa barǵan 3 aza­mattyń ústinen is qozǵaldy», dedi J.Ja­ńa­baev.

Odan bólek «Jýsan» operasııasynyń nátıjesinde qazaqstandyq 77 áıel radıkaldy ıdeologııadan óz erkimen bas tart­qany aıtyldy. «Sırııada terrorıstik uıymdardyń qurbany bolyp, «Jýsan» operasııasy barysynda qutqarylǵan birqatar otandasymyz týraly bilesizder. Atalǵan operasııa aldynda daıyndyq jumystary júrgizildi. «Jýsan» operasııasy arqyly barlyǵy 607 qazaqstandyq elge oraldy. Onyń ishinde 37 erkek, 157 áıel jáne 413 bala (sonyń ishinde 34 jetim bala) elge aman-saý jetkizildi. 59 adam qylmystyq jaýapqa tartyldy. Qazaqstanǵa kelgen soń otandastarymyzdy beıbit ómirge beıimdeý sharasy ótkizildi. Nátıjesinde, 88 áıel dástúrli dinimizdi qaıta qabyldap, 77 áıel radıkaldy ıdeologııadan bas tartty», dedi ol.

Alqaly jıyn aıasynda Qazaqstan Respýblıkasy Terrorızmge qarsy orta­ly­ǵynyń qoldaýymen terrorıstik tur­ǵydan osal (TTO) obektilerdi terrorızm­nen qorǵaý, sondaı-aq lańkestik qaterlerge qarsy is-qımyl sharalaryn jetildirý máseleleri boıynsha res­pýb­lıkalyq konferensııa ótkizildi.

Konferensııa ortalyq memlekettik jáne jergilikti atqarýshy organdardyń, Ulttyq qaýipsizdik komıtetiniń, ǵylymı-saraptamalyq qoǵamdastyqtyń, bıznes ortanyń ókilderin, sondaı-aq TTO obektilerdiń ıelerin, basshylaryn jáne ózge de beıindi qyzmetkerlerin jınady. Memlekettik organdardyń mamandary men ulttyq qaýipsizdik salasyndaǵy sarapshylar obektilerdiń terrorızmge qarsy qorǵalýynyń qazaqstandyq júıe­siniń aǵymdaǵy jaı-kúıi men damý pers­pektıvalaryn talqylady. Terro­rıstik sıpattaǵy qazirgi zamanǵy qaýip-qaterlerge qoldanystaǵy, ásirese adamdar kóp jınalatyn obektiler men bilim berý mekemelerindegi qaýipsizdik júıeleriniń máseleleri jeke qaraldy.

Ishki ister mınıstrliginiń sarapshysy kúzet qyzmetin lısenzııalaý bo­ıynsha qabyldanǵan zańnamalyq basta­ma­lardy damytýda terrorıstik turǵy­dan osal obektilerdiń qaýipsizdigin qamta­masyz etýge tartylatyn jeke kúzet uıym­daryna qoıylatyn talaptardy jarııa etti. Terrorızmge qarsy ortalyq shtaby turǵysynan osy jyly Úkimet qaý­lylarymen bekitilgen terrorıs­tik turǵydan osal obektilerge jatqy­zýdyń jańa qaǵıdalary men ólshem­sharttary, sondaı-aq olardy qorǵaýdy uıym­das­tyrýǵa qoıylatyn talaptar túsindi­rildi. Osy alańda terrorızmge qarsy is-sharalardy jarııalaý, onyń ishinde ter­rorızmge qarsy operasııa ótkizý kezeń­inde memlekettik organdar men BAQ-tyń ózara is-qımyl deńgeıin arttyrý úshin jýrnalısterge arnalǵan «Terrorıs­tik qaýip-qaterlerge aqparattyq den qoıý­daǵy BAQ-tyń róli, sondaı-aq dinı ekstre­mızm men terrorızmge qarsy nasıhat uıymdastyrý» taqyrybynda semınar-trenıng uıymdastyryldy.