Kenshiler astanasynda ótken «Tórtinshi onjyldyqtaǵy Táýelsiz Qazaqstan» óńirlik jastar forýmynda elimizdiń egemendik alǵan 30 jyl ishindegi jetistikteri áńgimege ózek boldy. Sonymen qatar alqaly jıynda jastar ózderiniń múmkindikterin júzege asyrýdyń joldaryn da talqyǵa saldy.
Forýmǵa qonaq retinde arnaıy shaqyrylǵan Abaı aýdanyndaǵy Qaraǵandy aýyldyq okrýginiń 26 jastaǵy ákimi Vladıslav Kıreı qazir jastardyń damýy men mansaptyq ósýi úshin barlyq múmkindikterdiń bar ekenin óziniń ómirin mysalǵa keltire otyryp, áserli áńgimelep berdi.
– Men qarapaıym otbasynda týyp óstim. Bala kezimnen qoǵamdyq is-sharalarǵa belsendi qatysyp júrdim. Qaztutynýodaǵy Qaraǵandy ekonomıkalyq ýnıversıtetin «Memlekettik jáne jergilikti basqarý» biliktiligi boıynsha támamdaǵan soń, bilim alýdy magıstratýrada jalǵastyrdym. Máskeýde oqý ótiliminen óttim. Abaı aýdanynyń jastar resýrstyq ortalyǵynda jumys istedim, ol uıymdy basqardym. Mine, bıyl Nur Otan partııasy atynan aýyl ákimderiniń saılaýyna óz kandıdatýramdy usynyp, jeńip shyqtym. Qazir ákim laýazymynda qyzmet etip júrgenime úsh aı boldy, – degen ol elimizde talpynǵan jasqa esh kedergi joqtyǵyn basa aıtty.
Al «Bolashaq» prezıdenttik baǵdarlamasynyń túlegi, PhD doktory Laýra Joldasova ómirde belgili bir maqsatqa jetý úshin kóp oqyp, erinbeı eńbek etýdiń qajet ekenine jastardyń nazaryn aýdardy.
– Men Ulybrıtanııanyń Brıstol ýnıversıtetiniń túlegimin. Ony támamdaǵannan keıin M.Nárikbaev atyndaǵy QazGZÝ Joǵary quqyq mektebinde dekannyń orynbasary bolyp eńbek ettim. Qazir E.Bóketov atyndaǵy Qaraǵandy ýnıversıtetinde zań fakýltetiniń kafedrasyn basqaramyn. Sondyqtan maqsatqa jetý úshin eń birinshi kezekte bilimge, eńbekke súıený kerektigin aıtqym keledi, – dep atap ótti ol.
Sonymen qatar forým qonaǵy – telejýrnalıst jáne Táýelsizdiktiń qurdasy Janbota Rahmetollauly erinbeı eńbek etý men talmaı izdenýdiń qandaı tyǵyryqtan bolsa da alyp shyǵatyn áleýetti kúsh ekenin aıta kelip, jastardy aldyǵa maqsat qoıyp, soǵan jetý jolynda tabandylyq tanytýǵa shaqyrdy.
Sondaı-aq forýmda sóz alǵan basqa da spıkerler tańdaǵan kásibin qandaı jolmen tapqandaryn, mansap pen jeke damýda belgili bir bıikterge qalaı jetkenderin aıtyp berdi. Olardyń árqaısysy ózderiniń mysalynda adam ómirindegi sáttiliktiń eńbekqorlyq pen tabandylyqtyń arqasynda ǵana múmkin bolatynyn aıtty.
Joǵary oqý oryndarynyń stýdentteri, eriktiler, kásipkerler, jumysshy jastar jáne táýelsizdiktiń qurdastary qatysqan forýmda Táýelsizdigimizdiń tórtinshi onjyldyǵyna qadam basqan Qazaqstannyń búginge deıin qol jetkizgen tabystary týraly aıtyldy. Bolashaqqa degen jospar quryldy.
Jıyn sońynda Qaraǵandy oblysynyń jastar saıasaty máseleleri jónindegi basqarma basshysy Birjan Álimjanov bastaǵan uıymdastyrýshylar bıznes-ıdeıalar baıqaýynyń jeńimpaz on stýdentin marapattady. Kózge túsip, nazar aýdartqan jobalardyń qatarynda tisti aǵartý stýdııasy, shınalyq servıs, ınnovasııalyq tehnologııalardy paıdalana otyryp, pıssa shyǵaratyn seh, akkýmýlıatorlyq batareıalardy symsyz zarıadtaýǵa arnalǵan qurylǵylardy, plastıkalyq buıymdardy, aǵashtan ulttyq stıldegi turmystyq zattardy shyǵaratyn avtomattandyrylǵan shaǵyn seh sııaqty ozyq ıdeıalar boldy.
Qaraǵandy oblysy