Aıbyny asqaq Uly Jeńistiń 65 jyldyq mereıtoıyna baılanysty keshe Qazaqstan Respýblıkasynyń Ulttyq muraǵatynda “Uly Otan soǵysy jyldaryndaǵy qazaqstandyqtar” atty qujattar kórmesi ashyldy. “Qazaqstan Respýblıkasynyń ardagerler uıymy” qoǵamdyq birlestigimen birlesip ashylǵan kórmege maıdangerlerdiń qujattary, “Qalaı, aman-saý jaqsy júrip jatyrsyz ba?” dep bastalatyn amandyq hattary, sýretteri men marapat qaǵazdary qoıylǵan.
Kórmeniń saltanatty ashylý rásiminen buryn jınalǵan jurtshylyqtyń nazaryna Uly Otan soǵysyna baılanysty qysqa metrajdy derekti fılm usynyldy. Sum soǵysty tek ekrannan kórip otyrǵandaryna shúkirshilik etkender beıbit kúnniń qanshalyqty qymbat ekenin janarlary toly jastarymen aıqyn ańǵartqandaı edi.
Fılm kórsetilgennen keıin ortaǵa Baılanys jáne aqparat mınıstrliginiń Aqparat jáne muraǵat komıteti tóraǵasynyń orynbasary Erbol Shaımerden shyǵyp, maıdan ardagerlerin kele jatqan Uly Jeńistiń 65 jyldyǵymen quttyqtady. Ol óz sózinde: “Uly Jeńis kúni – erekshe kún. Bul kún – ultymyzdyń erlik rýhyna taǵzym etetin kún. Bul kún – kózi tiri soǵys ardagerlerine qurmet kórsetetin kún. Mundaı kórmeler tek Astanada ǵana emes, elimizdiń barlyq aımaqtarynda ashylyp jatqany belgili. Ekinshi dúnıejúzilik soǵys – adamzat tarıhyndaǵy eń bir aýyr, qasireti mol soǵys. Qan jutqan keńes jaýyngerleriniń qatarynda qazaqstandyqtar da qaharmandyqpen soǵysty. Olardyń erligi árqashan urpaqqa uran bolyp qalmaq. Maıdangerlerdiń perzentteri retinde soǵystyń qasiretin, Jeńistiń ulylyǵyn barshamyz jaqsy bilemiz. Búgingi ortamyzda júrgen ardagerlerge kórsetetin ystyq yqylastarymyz ben izgi iltıpattarymyz eshýaqytta da azaımaq emes”, – dedi.
“Soǵys osylaı bastalyp edi...”, “Qazaqstandyqtar Uly Otan soǵysy maıdanynda”, “Bári maıdan úshin, bári jeńis úshin!”, “Velıkıı podvıg vash ıstorııa hranıt”, “Tarıhta qalǵan uly erlikter” atty taqyryptyq-ekspozısııalyq bólimderden turatyn kórmege sondaı-aq maıdanda jaýyngerlik tapsyrmalardy úlgili oryndaǵandary úshin jáne batyrlyq pen batyldyq kórsetkenderi úshin Keńes Odaǵynyń Batyry atanǵan qazaqstandyqtardyń jaýyngerlik joly týraly baıandalatyn “Qazaqstandyq Keńes Odaǵynyń batyrlary” atty kitap qoıylǵan.
Kórmede kózimizge keıbir hattar erekshe tústi. Máselen, ataqty gvardııalyq dıvızııanyń komandıri, general-maıor Ivan Panfılov jubaıyna jazǵan hatynda bylaı deıdi: “Amansyń ba, qymbattym! О́ziń men balalardy súıdim. Máskeýdi jaýǵa bermeımiz! Jaýyzdardy tankterimen qosa jermen jeksen etemiz. Dıvızııa jaqsy soqqy berýde. Gazetke shyqqan maqalany joldap otyrmyn.
Mýrochka, jatpaı-turmaı jumys istep, tyldy nyǵaıtyńdar. Seniń amanatyńdy aıbyndylyqpen oryndaýdamyn. Panfılov. 1941 jyldyń 1 jeltoqsany”. Qaryndashpen jazylsa da jazýy anyq kórinetin hatty oqyǵanda júregimiz shymyr ete tústi.
Kórmege Qazaqstan Respýblıkasynyń Ulttyq muraǵaty qorynan, Aqparat jáne muraǵattar komıtetiniń Ortalyq memlekettik muraǵatynan, Astana, Almaty qalalary, Almaty, Aqtóbe, Atyraý, Shyǵys Qazaqstan jáne basqa da oblystardyń muraǵattyq mekemelerinen, respýblıkanyń ardagerler uıymynan tańdap, iriktelip alynǵan 200-den astam qujattar men materıaldar qoıylǵan. Olar kórmege kelgen qaýymǵa Uly Jeńistiń, beıbitshiliktiń qadirin odan ármen bildire túsetinine senimdimiz.
Araı ÚIRENIShBEKQYZY.