Nur-Sultan qalasynda Mádenıet jáne sport mınıstrliginiń uıymdastyrýymen Táýelsizdiktiń 30 jyldyǵy aıasynda erekshe bilim berýdi qajet etetin balalarǵa arnalǵan NewArt festıvali ótti.
Jobanyń maqsaty – erekshe bilim berýdi qajet etetin balalarǵa ınklıýzıvti shyǵarmashylyq keńistik qurý jáne olardyń shyǵarmashylyq áleýetin ashý. Sondaı-aq talanttaryn damytýǵa ári ınklıýzıvti qoǵamda táýelsiz ómirge daıyndaýǵa yqpal etý.
Atalǵan fevtıval 3 kúnge sozyldy. Aldymen elordanyń eń kórnekti ǵımarattarynyń biri Báıterek monýmentinde erekshe bilim berýdi qajet etetin 40-qa jýyq balaǵa arnalǵan sýret jáne qolóner kórmesi ashyldy. Odan keıin is-shara Oqýshylar saraıynda «О́zińdi jyrlaımyz, týǵan el» atty mýzykalyq-poetıkalyq marafonmen jalǵasty. Sonymen qatar festıval sheńberinde Tumar sándik-qoldanbaly óner ortalyǵynda balalardy sándik-qoldanbaly jáne qolónerge oqytý sheberlik saǵattary ótti.
Festıvalǵa Aqmola oblysy, Túrkistan oblysy jáne Nur-Sultan qalasynan 70-ten astam baldyrǵan qatysty. Oǵan qosa Mádenıet jáne sport mınıstrliginiń ókilderi, qoǵam qaıratkerleri, sýretshi-dızaınerler men ónertanýshy, qolónershiler balalardy qoldaýǵa keldi.
Festıvaldyń jabylý saltanaty Red Bus týrıstik avtobýsymen Nur-Sultan qalasyna ekskýrsııa júrgizýmen jáne Báıterek monýmentinde estelik sýretterge túsýmen aıaqtaldy.