Bıylǵy 9 aıda Qyzylorda oblysyna 186 mlrd teńgeden astam ınvestısııa tartyldy. Aımaqta munaı óndirý kólemi 274 myń tonnaǵa tómendegenimen ken óndirý ónerkásibindegi ınvestısııa kólemi 62,2 mlrd teńgege jetip, byltyrǵy osy kezeńmen salystyrǵanda 6,8 mlrd teńgege ulǵaıdy. Indýstrııalandyrý baǵdarlamasy aıasyndaǵy jobalardyń júzege asyrylýy nátıjesinde kórsetkish 2,6 esege artqan. Bul týraly oblystyq ındýstrııalyq-ınnovasııalyq damý basqarmasynyń basshysy Rınat Sultangereev aıtyp berdi.
Byltyrdan bastap oblystyń 2023 jylǵa deıingi ekonomıkalyq damý jospary qabyldanyp, soǵan sáıkes 404 jobany júzege asyrý josparlanǵan. Sondaı-aq «Qyzylorda oblysynyń ınvestısııalyq múmkindikteri» gaıdbýgi ázirlenip, oǵan ınvestısııa qajet etetin quny 967 mlrd teńgeniń 35 iri jobasy engizilip otyr.
Investısııa tartý jáne jańa ınvestısııalyq jobalardy júzege asyrý úshin jyl basynan beri oblysqa 5 roýd-shoý uıymdastyryldy. Onyń ishinde, beınekonferensııa rejiminde Mońǵolııa jáne Fransııa memleketteri ókilderimen 2 kezdesý ótkizilgen. Buǵan qosa, Lıtva, О́zbekstan jáne Koreıa elshilikteriniń delegasııalary oblysqa issaparmen keldi.
– Oblysta birneshe qarjy uıymdary jumys istep keledi. Jergilikti ınvestısııalyq jobalardyń júzege asyrylýyna qarjylaı súıemeldeý jasaıtyn «Baıqońyr» áleýmettik-kásipkerlik korporasııasynyń qyzmeti tolyqtaı qaıta quryldy. Atap ótý qajet, mekeme nesıe berýshi emes, qurylatyn bıznestiń tolyqqandy seriktesi retinde qatysady, – deıdi basqarma basshysy.
Buǵan qosa, óńirde «О́ńirlik ınvestısııalyq ortalyǵy» arqyly jas kásipkerler jyldyq ústemeaqysy 2%-ben 5 jylǵa 400 mln teńgege deıin jeńildetilgen nesıe ala alady. Bul nesıeniń taǵy bir ereksheligi – 1,5 jylǵa deıin nesıelik demalys alýǵa bolady. Keler jyly jeńildetilgen nesıege bólinetin qarjy kólemi 500 mln teńgege deıin ulǵaımaq.
Memleket tarapynan beriletin qoldaý sharalaryn nasıhattaý maqsatynda jaqynda Qyzylorda oblysy ákimdigi jáne Kazakh Invest Ulttyq kompanııasy birlesip «Kásipkerlik qyzmet pen ınvestorlardy memlekettik qoldaý sharalary» taqyrybynda trenıng ótkizdi. Is-sharaǵa Almaty, Jambyl, Túrkistan oblystary jáne Shymkent qalasy ákimdiginiń ókilderi, damý ınstıtýttary men qarjy uıymdarynan quralǵan 80-nen astam adam onlaın formatta qatysyp, óz suraqtaryna jaýap aldy.
Investısııalyq preferensııa alýǵa qujattar ázirleý barysynda kásiporyndarǵa front-ofıs tolyqtaı súıemeldeý jumystaryn júrgizedi. Front-ofıstiń ereksheligi – 10 mekemeniń qyzmeti bir jerge shoǵyrlanǵan. Munda «bir tereze» qaǵıdasy boıynsha jer, sáýlet, qurylys, memlekettik kirister, ınjenerlik kommýnıkasııalarǵa qosylý máseleleri jáne basqa da baǵyt boıynsha barlyǵy 90 qyzmet túrin kórsetedi. Ortalyq jumysyn avtomattandyrý nátıjesinde tehnıkalyq shart berý merzimi 1 aıdan 5 jumys kúnine deıin qysqartylyp otyr.
Qyzylorda oblysy