Qalaı deseńiz de, qazaq dalasyn sharlaǵan adam ne sýretshi, ne aqyn bolatyny anyq. Olaı bolmaǵan jaǵdaıda da, aýzynan sýy aǵyp, azanǵa deıin áńgimeler edi. Etnograf ǵalym Grıgorıı Potanın: «Maǵan búkil qazaq dalasy án salyp turǵandaı bolady», dep teginnen-tegin aıtpasa kerek. Jer júzin aralaǵan oıshyl orystyń osynshama tamsanýynyń astarynda úlken mahabbat jatqany anyq.
Endigi áńgimeniń baǵyt-baǵdary belgili sýretshi Evgenıı Frıdlınniń «Kamenka ústirti» kartınasyna qaraı oıyspaq. Pavlodarlyq qylqalam sheberiniń barlyq kartınasy qalalardyń, kóshelerdiń, jekelegen ǵımarattardyń, tabıǵattyń jáne adam turmysynyń tarıhynan taǵan tartady. Ol óziniń kórgen-bilgenin júrek kózinen ótkizýge sheber. Sonysymen de erekshe ispetti.
Avtor týyndylarynda tabıǵattyń raıy men bolmysyn sátti kórsete biledi. О́zi bir suhbatynda «Almaty meniń júregime óte jaqyn, ondaǵan jyl boıy bizdiń ońtústik astanamyzdy súısine otyryp jazyp kelemin», dep aıtqany bar. Oǵan keremet sáýlet óneri pen qalany qorshap turǵan tumsa tabıǵattyń ǵajaıyptary shynaıy shabyt syılaıtyndaı.
Evgenıı Frıdlın «Kamenka ústirti» kartınasynda taý peızajy janryna bet burady. Alyp taýdyń eteginde aýyl ornalasqan. Ol kók munar ishinde kózge alystan túsedi. Kópqabatty úılerdiń shatyrlary aqsha bult tárizdi aspanǵa umsynyp tur, kórermenge aǵash boıyna oranǵan kóshelerdi meńzeıdi.
Sýretshi kartınanyń aldyńǵy planyn jasyl tústi údemelete otyryp, qanyq boıaýmen jazǵan. Býyrqanǵan kók reńkpen úılerdi beıneleı otyryp, serpindi tústik aksent beredi. Tústiń qanyqtyǵy birte-birte álsireıdi de, kórermen alystaǵy ormandy taýdyń qalaı paıda bolǵanyn kóredi. Kógildir taýlardyń basy birtindep bultqa oranyp, aǵara beredi. Týrısterdiń, tipti qazaqstandyqtardyń únemi tańdanysyn týdyratyn jazdaǵy qarly alyp shyńdar men qalyń kók shóptiń qarama-qaıshylyǵyn ádemi jetkizgen. Kartınanyń qupııasy osynda.
Qar, bozǵylt aspandaǵy bult, bulardyń barlyǵy salqyndyq pen yzǵardy, sútteı pák sulýlyqty sıpattap tur. Taýlar eshqashan ish pystyrmaıdy. Olar qandaı da bir syrdy, kózge kórinbeıtin basqa shyndyqty jasyryp turatyndaı.